Oʻzbekiston Respublikasi Energetika vazirligida tizim tashkilotlari va aksiyadorlik jamiyatlaridagi yoshlar yetakchilari bilan navbatdagi uchrashuv boʻlib oʻtdi.
Unda 2023-yilda yoqilgʻi-energetika tarmogʻida yoshlarga oid davlat siyosatini amalga oshirish natijasida erishilgan yutuqlar, yoʻl qoʻyilgan kamchiliklar, shuningdek, joriy yilda amalga oshiriladigan rejalar muhokama qilindi.
Bugungi kunda yoqilgʻi-energetika kompleksi tizimida 105 mingdan ziyod ishchi va xizmatchilar faoliyat yuritadi. Ularning 17 ming 400 nafarini 30 yoshgacha boʻlgan xodimlar tashkil qiladi. Shundan 30 yoshgacha boʻlgan ayollar 1 ming 669 nafardan iboratdir.
Hozirgi vaqtda 340 nafar yosh turli pogʻonalarda rahbarlik lavozimida ishlamoqda. Shundan 12 nafari xotin-qizlardir.
2023-yil yakuni boʻyicha 262 nafar yosh oliy oʻquv yurtini tamomlaganidan keyin, 417 nafar yosh esa kollej va texnikumni bitirganidan soʻng ishga qabul qilingan.
Oʻz bilimi, jonkuyarligi bilan faoliyat yuritib, jamoasi ichida namuna koʻrsatib kelayotgan yoshlar yuksak davlat mukofotlari bilan taqdirlanayotgani alohida taʼkidlandi. Xususan, Prezidentimiz Farmoni bilan 2023-yil 30-iyun kuni yoqilgʻi-energetika kompleksida faoliyat yuritayotgan bir guruh yoshlar “Kelajak bunyodkori” medali bilan mukofotlandi.
Davlatimiz rahbarining bunday yuksak mukofoti tizim tashkilotlaridagi boshqa yoshlarni ham ruhlantirgani, ular ham oʻz kasbiga yuksak mehr bilan munosabatda boʻlgan holda xizmat qilayotgani qayd etildi.
Bundan tashqari, 2023-yil 20-aprel kuni Sirdaryo viloyatining Shirin shahrida “Oʻzbekiston yoshlari forumi” boʻlib oʻtdi. Forum doirasida Shirin shahrida Yoshlar markazi tantanali ochildi. Forumda yoqilgʻi-energetika tarmogʻida mehnat qilayotgan 400 nafardan ortiq yigit-qizlar qatnashdi.
Tizimda faoliyat olib borayotgan yoshlar oʻrtasida “Oʻzbekiston boʻylab sayohat qil!» loyihasi amalga oshirildi.
Yosh mutaxassislarning rivojlangan davlatlarda tajriba orttirishini tashkil qilish maqsadida ular xorij mamlakatlariga xizmat safarlariga va taʼlim olish uchun nufuzli oliy taʼlim muassasalariga yuborilmoqda.
Xususan, Energetika vazirligi yosh mutaxassislari “El-yurt umidi” jamgʻarmasi tomonidan Avstraliyada magistratura dasturida taʼlim olmoqda.
Energetika vazirligi tomonidan 2024-yilda yoshlarning boʻsh vaqtini mazmunli tashkil etish, ijtimoiy faolligini oshirish, iqtidori, isteʼdodi va tashabbuslarini ragʻbatlantirish hamda hayotda oʻz oʻrnini topishlariga koʻmaklashishga qaratilgan loyiha va tadbirlar dasturi tasdiqlangan.
Unga asosan, doimiy ravishda tizim tashkilotlarida faoliyat yuritayotgan yoshlar ishtirokida ochiq muloqotlar, “Rahbar va yoshlar uchrashuvi”, qator sport tadbirlari (futbol, shaxmat, tennis, badminton, marafon) oʻtkazib boriladi.
Uchrashuvda yoshlar bilan har oyda bir marotaba mana shunday uchrashuv oʻtkazib, amalga oshirilgan ishlarni tahlil qilish hamda kelgusi vazifalarni belgilashga kelishib olindi.
Energetika vazirligi Axborot xizmati.
227
