Soʻnggi yillarda yurtimizda energiya resurslaridan oqilona foydalanish, energiya samaradorlik va tejamkorlik masalalariga alohida eʼtibor qaratilmoqda. Ushbu yoʻnalishda Davlatimiz rahbari boshchiligida videoselektor yigʻilishlari oʻtkazilib, qator Farmon va qarorlar qabul qilindi. Ular doirasida ishlarni chuqur tahlil qilgan holda tashkil etish maqsadida har bir vazirlik va idoralar rahbarlariga topshiriqlar berilmoqda.
Mazkur ishlarni tizimli ravishda yo‘lga qo‘yish maqsadida bugun, 5-mart kuni poytaxtimizda Oʻzbekiston Respublikasi Energetika vazirligi, Togʻ-kon sanoati va geologiya vazirligi hamda Xalqaro moliya korporatsiyasi (IFC) hamkorligida “Binolarni isitish va sovitish uchun sayoz geotermal energiyadan foydalanish” mavzusida seminar tashkil qilindi.
Unda Energetika, Togʻ-kon sanoati va geologiya vazirliklari, oliy taʼlim muassasalari, xalqaro moliya institutlari, Shveysariya, Shvetsiya, Turkiya, Polsha, Italiya, Serbiya, Fransiya kabi davlatlardan kelgan professor olimlar oʻz maʼruzalari bilan ishtirok etdi.
Seminarda Oʻzbekistonda geotermal yechimlarning ekologik va iqtisodiy-tarkibiy qismlari, meʼyoriy-huquqiy asoslari, mavjud hamda potensial loyihalar va ularni amalga oshirish uchun shart-sharoitlar yaratish masalalari muhokama qilindi.
Tadbirda geotermal energetika loyihalarini amalga oshirish boʻyicha xalqaro tajriba ham taqdim etilib, ushbu sohaning bugungi faol rivojlanishi hamda boshqa davlatlarda uning ustuvorligi muhokama qilindi. Xususan, geotermal energiya boʻyicha AQSh, Shveysariya, Fransiya, Polsha, Islandiya, Xitoy, Turkiya kabi davlatlar yetakchilik qilishi taʼkidlandi va ularda taʼlim muassasalari, shifoxonalar hamda turarjoy binolarida mazkur energiyadan foydalanishga oid qator misollar keltirildi.
Tadbir yakunida Oʻzbekistonda energiya xavfsizligini oshirish va zararli chiqindilarni kamaytirish maqsadida isitish hamda sovitish tizimlari uchun geotermal energiyadan foydalanish boʻyicha keyingi rejalar belgilandi.
Maʼlumot uchun: Sayoz geotermal energiya – bu yer qaʼrining 100-200 metr chuqurlikkacha boʻlgan qismidagi issiqlik energiyasi boʻlib, yil davomida deyarli oʻzgarmas haroratda boʻladi. Ushbu energiya manbai tabiiy gaz va yer yuzasidagi boshqa qayta tiklanuvchi energiya manbalariga muqobil boʻlgan “yashil” energiya hisoblanadi. Geotermal energiya quvurlar, ishchi suyuqlik va issiqlik nasoslari orqali yer qaʼridan bino ichkarisiga olib kiriladi.
Energetika vazirligi Axborot xizmati.
264
