Assalomu alaykum, muhtarama onaxonlar!
Hurmatli opa-singillar!
Sizlarni, energetika sohasida astoydil mehnat qilib kelayotgan ayollarni ezgulik va goʻzallik bayrami 8-mart – Xalqaro xotin-qizlar kuni bilan samimiy muborakbod etaman.
Oila va jamiyat ustuni, hayotimizning fayzi va koʻrki boʻlgan xotin-qizlarni eʼzozlash, ularga hurmat va ehtirom koʻrsatish xalqimiz uchun azal-azaldan buyuk qadriyat boʻlib kelgan va shunday boʻlib qoladi. Chunki sizlar bilan hayotimiz goʻzal va mazmunli, xonadonlarimiz obod va nurafshondir.
Ayol zoti haqida, uning qanday tengsiz latofat va nafosat sohibasi, ezgulik va fidoyilik ramzi, xonadonlarimizning fayzu farishtasi ekani haqida tariximizda ulugʻ mutafakkirlar, shoir va allomalar qancha-qancha dil soʻzlarini bayon etganlar.
Davlatimiz rahbari Sh.Mirziyoevning taʼbiri bilan aytganda, “Sizlar biz uchun avvalo muqaddas ona, aziz Vatan, oila timsoli, bitmas-tuganmas mehr, ezgulik va kuch-gʻayrat manbaidirsiz”.
Vatanimiz taraqqiyotida, oila va jamiyat hayotida xotin-qizlar muhim oʻrin va mavqega ega. Ayollarimiz mamlakatimizning ijtimoiy-siyosiy, siyosiy-iqtisodiy hayotidagi barcha sohalarda xususan, davlat boshqaruvi va vakillik organlarida, ishlab chiqarish, tadbirkorlik, fermerlik, sogʻliqni saqlash, taʼlim, maʼrifat, madaniyat va boshqa sohalarda samarali mehnat qilishmoqda.
Fursatdan foydalanib, keyingi yillarda yurtboshimiz rahnamoligida energetika sohasida, qolaversa neft-gaz sanoati, elektr energiyasi ishlab chiqarish, elektr energiyasi va tabiiy hamda suyultirilgan gaz, koʻmir taʼminoti va boshqa koʻplab tarmoqlarda amalga oshirilayotgan ulkan oʻzgarishlar, keng qamrovli islohotlar jarayonida faol ishtirok etib kelayotgan sizlarga va siz orqali sohada astoydil mehnat qilib kelayotgan barcha xotin-qizlarga minnatdorchilik bildiramiz.
Shu bilan birga oldimizda turgan muhim vazifalar va rejalarni amalga oshirishda sizlar bundan keyin ham faol ishtirok etib, peshqadamlar safida boʻlishingizga ishonaman.
Qadrli opa-singillar!
Bahorning ilk bayrami munosabati bilan siz fidoyi va lobar xotin-qizlarga har jabhada ilgʻor, tashabbuskor, ibratli ekanligingizni taʼkidlashni istardim.
Oʻzbekistonda xotin-qizlarning barcha sohalardagi fidokorona mehnati hisobidan mamlakatimizning qudrati va salohiyati, xalqaro obroʻ-eʼtibori tobora ortib bormoqda.
Yurtimizda xotin-qizlarni har tomonlama qoʻllab-quvvatlash, onalik va bolalikni muhofaza qilish, oila mustahkamligini taʼminlash davlat siyosati darajasida ekanligini alohida eʼtirof etsak arziydi.
Xabaringiz bor, respublikamizda ayollarni qiynayotgan muammolarni bartaraf etish boʻyicha manzilli ish olib borish maqsadida yangi tizim — “Ayollar daftari” joriy etildi. Unga muvofiq ijtimoiy himoyaga muhtoj, turmushi ogʻir ayollar ish bilan taʼminlanmoqda, ularga imtiyozli kreditlar berilmoqda, xotin-qizlar tadbirkorlik va kasb-hunar markazlarida oʻqitilmoqda, hunarmandchilik va kasanachilikka jalb etilmoqda, uy-joy sotib olish uchun opa-singillarimizga boshlangʻich badallar toʻlab berilmoqda. Eng asosiysi bu xayrli ishlar izchil davom ettiriladi. Yurtboshimiz taʼkidlaganidek, Oʻzbekistonda bironta ham ayol davlat va jamiyat eʼtiboridan chetda qolmaydi.
Soʻzimning yakunida mana shunday qutlugʻ ayyom kunida sizlarni 8-mart bayrami bilan yana bir bor chin qalbimdan qutlab, barchangizga sihat-salomatlik, oilalaringizga tinchlik-xotirjamlik, fayzu baraka tilayman! Hamisha sogʻ-salomat boʻlinglar!
396
