Бугун, 29 январь куни Энергетика вазирлигида «Газпром» ОАЖ раис ўринбосари Виталий Маркелов бошчилигидаги делегацияси билан музакаралар бўлиб ўтди.
Учрашув давомида «Ўзбекнефтегаз» АЖ ва «Газпром» ОАЖ ўртасида қўшма нефт-газ лойиҳалари бўйича аввал эришилган келишувлар, шу жумладан Ўзбекистон Республикаси Президентининг «Ўзбекистон Республикасининг Устюрт минтақасидаги Жел конини маҳсулот тақсимотига оид битим шартлари асосида ўзлаштириш тўғрисида»ги қарорининг амалга оширилиши муҳокама қилинди.
Мазкур қарор доирасида, 2019 йил сентябрида «Жел конини МТБ шартлари асосида ўзлаштириш» бўйича Техник топшириқ (ТТ) келишилган, сўнгра «ЎзЛИТИнефтгаз» АЖ томонидан ушбу лойиҳа ишлаб чиқилган ва 2020 йил 14 январда «Ўзбекнефтегаз» АЖ Соҳа илмий-техник кенгашининг лойиҳанинг ТИА бўйича ТТ ни кўриб чиқиш бўйича йиғилиши ўтказилди.
Учрашувда таъкидланганидек, Ўзбекистон томонидан 2 йил давомида «Газпром» ОАЖ мутахассислари 5 та блок бўйича геологик материаллар ўрганиб чиқилган. Жумладан, Чегара-Тагман, Чинабод, Узункуин, Коссор, шунингдек Бухоро-Хива минтақалари. Ҳозирги пайтда «Газпром» ОАЖ томонидан ушбу масалалар бўйича корпоратив қарор қабул қилиниши кутилмоқда. Шундан сўнг ишларни ўзаро келишилган жадвал асосида олиб бориш мумкин бўлади.
Шунингдек, «Газпром» ОАЖ га тажриба алмашиш, кадрларни тайёрлаш ва уларнинг малакасини ошириш масалаларида самарали ҳамкорлиги учун миннатдорлик билдирилди. Таъкидландики, «Газпром» ОАЖ томонидан ташкил қилинган курсларда Ўзбекистондан 78 нафар мутахассис таълим олди, 2020 йилда ҳам шундай курслар ўтказилиши режалаштирилмоқда.
Учрашувда айни пайтда стандартлаштириш ва мувофиқликни баҳолаш соҳаларида ўзаро ҳамкорликнинг аҳамияти алоҳида таъкидланди. Бу борада «Ўзбекнефтегаз» АЖ ва «Газпром» ОАЖ ўртасида «ИНТЕРГАЗСЕРТ» ихтиёрий сертификациялаш тизимига мувофиқликни баҳолаш бўйича ишлар доирасида технологик ривожланиш, стандартлаштириш соҳаларида ўзаро ҳамкорлик тўғрисидаги меморандум устида иш олиб борилмоқда.
Учрашувда Россия томони Бухоро-Хива инвестицион блокида 2 ва 3D тадқиқотлари ўтказилиши кўзда тутилган ҳолда геолог қидирув ишларини давом эттиришдан манфаатдор эканлигини қайд этди.
Шунингдек томонлар ҳамкорликнинг истиқболли йўналишларини, жумладан магистрал газ тармоқларини ривожлантиришни муҳокама қилди. Россия томонига Ўзбекистон нефть газ соҳасини ислоҳ қилишнинг асосий йўналишлари ва бу соҳада амалга ошириладиган йирик лойиҳалар ҳақида маълумотлар берилди.
Ўзбекистон Республикаси
Энергетика вазирлиги Матбуот хизмати
1384
