Assalomu alaykum!
Kecha, 13-mart kuni iste’molchilarni energiya resurslari bilan barqaror ta’minlash bo‘yicha amalga oshirilgan ishlar haqida ma’lumot beramiz.
13-mart kuni elektr stansiyalar orqali 245,8 mln kVt·soat, rejadagiga nisbatan 7 foiz ko‘p elektr energiyasi ishlab chiqarildi. Buning uchun issiqlik elektr stansiyalarida 51,1 mln kubometr tabiiy gaz, 18,6 ming tonna ko‘mir hamda 2,4 ming tonna mazut yoqildi.
Turkmaniston Respublikasidan 15 mln kVt·soat elektr energiyasi import qilindi.
Respublika iste’molchilariga 229,1 mln kVt·soat, rejadagiga nisbatan 11 foiz ko‘p elektr energiyasi, 153,4 mln kubometr, rejadagiga nisbatan 15 foiz ko‘p tabiiy gaz yetkazib berildi.
13-mart kuni mamlakatimiz bo‘ylab yuz bergan kuchli yomg‘ir va qattiq shamol tufayli tarmoqlarda sodir bo‘lgan avariyalar oqibatida, qolaversa, kutilmagan boshqa avariyalarning oldini olish maqsadida 150 MVt elektr energiyasi yetkazib berilmadi.
Kecha mamlakatimizdagi 1 ming 347 ta avtomobillarga gaz to‘ldirish kompressor shoxobchasi orqali jami 13 million 941 ming kubometr tabiiy gaz sotildi.
Shuningdek, avtomobillarga gaz quyish stansiyalari tomonidan iste’molchilarga 860 ming tonna suyultirilgan gaz yetkazib berildi.
Aholi va iqtisodiyot tarmoqlari avtobenzin hamda dizel yonilg‘isi bilan mavjud ehtiyojni to‘liq qoplaydigan darajada ta’minlanmoqda. Xususan, 12-mart kuni “O‘zbekneftgaz” aksiyadorlik jamiyati tomonidan yurtimizdagi barcha avtomobillarga yonilg‘i quyish shoxobchalariga 3 ming 200 tonna avtobenzin yetkazib berildi.
Avtomobillarga yonilg‘i quyish shoxobchalarida sotish uchun birja savdolariga qo‘yilgan 6 ming 380 tonna avtobenzinning 3 ming 746 tonnasi, 1 ming 366 tonna dizel yonilg‘isining esa 1 ming 159 tonnasi sotildi.
Vazirlik tizimidagi tashkilotlar korxonalarida qazib chiqarish va ishlab chiqarish ishlari o‘rnatilgan tartibda olib borilmoqda.
Respublika hududlari bo‘ylab elektr tarmoqlari hamda transformator punktlarida yuklamalarning ortishi hisobiga yuzaga kelayotgan nosozliklar ham tezkor bartaraf etib borilmoqda.
Kecha mamlakatimiz bo‘ylab kuchli yomg‘ir va qattiq shamol tufayli elektr qurilmalarida yuzaga kelgan 6 ta, gaz ta’minotida yuzaga kelgan 4 ta nosozlik bartaraf qilindi.
Xususan, soat 13 dan 19 daqiqa o‘tganida Toshkent shahrida 110 kVli “L-D-Yu” elektr uzatish tarmog‘i avariyaviy o‘chgan. Oqibatda Sergeli, Yangihayot va Yakkasaroy tumanlaridagi 19 ming 250 ta iste’molchi hamda kichik ishlab chiqarish sanoat korxonalari elektr ta’minotidan uzilgan. Soat 14 dan 34 daqiqa o‘tganida 13 mingta iste’molchi boshqa manbaga o‘tkazilgan. Soat 16 dan 50 daqiqa o‘tganida nosozlik bartaraf qilinib, elektr ta’minoti to‘liq tiklangan.
Soat 22 dan 42 daqiqa o‘tganida 220 kVli “L-1-X-2” elektr uzatish tarmog‘ida nosozlik kuzatilgan. Oqibatda “Taxiatosh” IESda 8-sonli energoblok 135 MVt quvvat bilan avtomatikadan o‘chib, 23 ming 800 ta iste’molchi va kichik ishlab chiqarish sanoat korxonalari elektr ta’minotidan uzilgan. Soat 23 dan 40 daqiqa o‘tganida avtomatikadan o‘chgan tarmoqlar ishga qo‘yilib, iste’molchilarning elektr ta’minoti to‘liq tiklandi.
Bugun soat 8 dan 40 daqiqa o‘tganida Jizzax viloyatida kuchli shamol shiddatli qor tufayli 6-10 kVli 5 ta elektr uzatish tarmog‘ida nosozlik yuzaga kelgan. Buning natijasida Sharof Rashidov hamda Forish tumanlaridagi 1 ming 600 ta iste’molchi va kichik ishlab chiqarish sanoat korxonalari elektr ta’minotidan uzilgan.
Hozirgi vaqtda noqulay ob-havo sharoitiga qaramasdan maxsus brigadalar tarafidan ushbu nosozlik barataraf qilinmoqda.
13-mart kuni elektr ta’minotidagi uzilishlar yuzasidan Energetika vazirligi tizim tashkilotlariga iste’molchilardan 213 ta murojaat kelib tushdi va barchasi maxsus brigadalar tomonidan bartaraf etildi.
Tabiiy hamda suyultirilgan gaz ta’minoti bo‘yicha kelib tushgan 208 ta murojaat bo‘yicha ham tegishli tartibda tezkor chora-tadbirlar ko‘rildi.
Hurmatli iste’molchilar! Agar Siz elektr energiyasi va gaz ta’minoti bo‘yicha qandaydir muammoga duch kelsangiz, elektr energiyasi ta’minoti yuzasidan 1154 qisqa raqamiga, shuningdek, 71-207-23-76 telefon raqami yoki “Telegram”dagi @het_admin administratorga, gaz ta’minoti yuzasidan 1104, 104 qisqa raqamlariga, shuningdek, 71-202-11-04 telefon raqami yoki “Facebook” ijtimoiy tarmog‘idagi maxsus guruhga hamda ko‘mir ta’minoti yuzasidan 78-148-30-03, 71-244-38-28 telefon raqamlariga murojaat qilishingiz mumkin.
E’tiboringiz uchun rahmat.
317
