2020 йил 29 январь куни Ўзбекистон Республикаси Энергетика вазирлигида Жаҳон банкининг Европа ва Марказий Осиё инфраструктураси бўйича минтақавий директори Лучио Монари бошчилигидаги Жаҳон банки делегацияси билан музокара ўтказилди.
Мулоқот давомида томонлар Энергетика вазирлиги ва Жаҳон банки ўртасида Ўзбекистонда энергетика соҳасида ўтказилаётган ислоҳотларни қўллаб-қувватлашга қаратилган ҳамкорлик масалаларини муҳокама қилдилар.
Ўзбекистон Республикаси Энергетика вазири ўринбосари Шерзод Ходжаев таъкидлаганидек, 2019 йил июль ойида Тошкентда бўлиб ўтган халқаро «давра столи»да халқаро молия институтлари (ХМИ) билан ҳамкорликда тайёрланган Мамлакатнинг электр тармоғини ислоҳ этиш бўйича амалий тадбирлар режаси лойиҳаси тақдим этилган эди.
Томонлар Жаҳон банки билан қайта тикланадиган энергия манбалари асосида ишлаб чиқариш қувватларини яратиш соҳасида ҳамкорлик ўсиб бораётганини таъкидлаган эдилар. Жумладан, Энергетика вазирлиги Жаҳон банки таркибига кирувчи Халқаро молия корпорацияси (ХМК), шунингдек Осиё тараққиёт банки билан 2025 йилга қадар қуввати 2 ГВт бўлган фотоэлектр (қуёш) станциясини қуриш бўйича салоҳиятли инвесторни аниқлаш юзасидан тегишли ишларни олиб бормоқда.
Шунингдек, Халқаро молия корпорацияси билан ҳамкорликда қуввати 1250-1500 МВт га тенг иссиқлик электр станцияси қурилиши лойиҳаси доирасида тендер ўтказиш масаласи устида иш олиб бормоқда. Тендер ғолибини аниқлаш 2020 йилнинг октябрь ойига режалаштирилган.
Музокаралар чоғида Жаҳон банкининг қўллаб-қувватлаш объекти бўлиши мумкин бўлган бошқа истиқболли лойиҳалар ҳам муҳокама қилинди. Жумладан, мамлакатда 2021-2023 йилларда 150 мингта хусусий уйларга ҳар бирининг қуввати 2 кВт бўлган фотоэлектр станцияларини ўрнатиш дастури устида ишланмоқда.
Бундан ташқари, баҳор ва куз мавсумида автоном энергия таъминоти бўйича мақсадли дастурларни (электр, иссиқлик ва биогаз) ишлаб чиқиш учун республиканинг 33 потенциал қишлоқ ва чекка ҳудудлари аниқланди.
Энергетика вазирлиги томонидан Жаҳон банки билан корпоратив бошқарувни жорий этиш, корхоналарни тижоратлаштириш ва энергетика соҳасида тариф ислоҳотларини амалга ошириш каби устувор йўналишларда ҳамкорлик истиқболлар мавжудлиги ҳам таъкидланди.
Жаҳон банкининг Европа ва Марказий Осиё инфратузилмаси бўйича минтақавий директори Луцио Монари ўз навбатида, Жаҳон банки Ўзбекистон билан ҳамкорлик алоқаларини ҳар томонлама ривожлантиришга тайёр эканини таъкидлаб, мамлакатнинг электр энергетикаси соҳасини ислоҳ қилиш тажрибаси Жаҳон банкида катта қизиқиш уйғотаётганини маълум қилди.
Учрашув давомида томонлар, шунингдек, нефть-газ саноатини ислоҳ қилиш бўйича ҳамкорлик истиқболларини муҳокама қилдилар. Жаҳон банки ушбу соҳадаги ислоҳотларнинг бориши ва углеводородларни қазиб олишдан то якуний истеъмолчиларгача бўлган барча ишлаб чиқариш жараёнларини ўзида мужассамлаштирган Бош режа ишлаб чиқиш мақсадида йиғилиш ўтказишни таклиф қилди.
Ўзбекистон Республикаси
Энергетика вазирлиги Ахборот хизмати
953
