O‘zbekistonda qayta tiklanuvchi energiya manbalarini joriy etish ishlari yuqori sur’atlarda davom etmoqda va ushbu qurilmalarga texnik xizmat ko‘rsatish muhim hisoblanadi.
Surxondaryo viloyatida kichik quvvatli qayta tiklanuvchi energiya manbalari qurilmalarini o‘rnatish va ekspluatatsiya qilish ishlarini tizimli tashkil etish bo‘yicha “Yashil energiya” kompaniyasining filiali faoliyati yo‘lga qo‘yildi.
Xususan, bugun, 5-aprel kuni kompaniyaning Surxondaryo viloyatida quyosh panellariga texnik xizmat ko‘rsatish servis markazi ishga tushirildi.
Endi kompaniya viloyatdagi ijtimoiy soha obyektlari, davlat organlari hamda boshqa tashkilotlarning bino va inshootlarida kichik quvvatli qayta tiklanuvchi energiya manbalari qurilmalarini o‘rnatish hamda ekspluatatsiyasini nazorat qilish, shu bilan birga ularni doimiy ravishda monitoring qilib boradilar.
Mazkur filial quyosh fotoelektr stansiyalarining ish rejimlarini doimiy nazorat qilish, yuzaga kelgan nosozliklarni o‘z vaqtida aniqlash hamda bartaraf etish, quyosh panellariga servis xizmati ko‘rsatish singari xizmatlarni ko‘rsatadi.
Eslatib o‘tamiz, 2023-yilning 10-11-dekabr kunlari Andijon viloyati va Qoraqalpog‘iston Respublikasida, shuningdek, joriy yil yanvar-mart oylarida Jizzax, Xorazm, Farg‘ona, Namangan, Sirdaryo, Samarqand, Navoiy va Buxoro viloyatlarida xuddi mana shunday quyosh panellariga texnik xizmat ko‘rsatish servis markazlari ishga tushirildi.
Yana bir ahamiyatli jihati, “Yashil energiya” kompaniyasi quyosh panellarini changdan tozalash xizmatini ham yo‘lga qo‘ydi.
Ma’lumot uchun: Ertaga Qashqadaryo viloyatida ham mana shunday servis markazlari ishga tushirilishi rejalashtirilgan.
496
