Qashqadaryo viloyatida quyosh panellariga texnik xizmat ko‘rsatish servis markazi ishga tushirildi
Yurtimizda yuqori surʼatlarda joriy etib borilayotgan qayta tiklanuvchi energiya manbalari qurilmalariga texnik xizmat koʻrsatish masalasi dolzarb masalalardan hisoblanadi.
Shu maqsadda Qashqadaryo viloyatida ham kichik quvvatli qayta tiklanuvchi energiya manbalari qurilmalarini o‘rnatish va ekspluatatsiya qilish ishlarini tizimli tashkil etish bo‘yicha “Yashil energiya” kompaniyasining filiali faoliyati yo‘lga qo‘yildi.
Xususan, bugun, 6-aprel kuni kompaniyaning Qashqadaryo viloyatida quyosh panellariga texnik xizmat ko‘rsatish servis markazi ishga tushirildi.
Endi kompaniya viloyatdagi ijtimoiy soha obyektlari, davlat organlari hamda boshqa tashkilotlarning bino va inshootlarida kichik quvvatli qayta tiklanuvchi energiya manbalari qurilmalarini o‘rnatish hamda ekspluatatsiyasini nazorat qilish bilan birga, doimiy ravishda monitoring ham qilib boradi.
Mazkur filial quyosh fotoelektr stansiyalarining ish rejimini doimiy nazorat qilish, yuzaga kelgan nosozliklarni o‘z vaqtida aniqlash hamda bartaraf etish, quyosh panellariga servis xizmati ko‘rsatish singari xizmatlarni taqdim qilmoqda.
250
