Bosh prokuratura huzuridagi Departamentning Bag‘dod tumani bo‘limi tomonidan o‘tkazilgan tergovga qadar tekshiruvda “Sh.P.” fermer xo‘jaligi mas’ul shaxslari dala maydoniga o‘rnatilgan elektr energiyasini hisobga olish uskunasining ko‘rsatkichlarini o‘zgartirish maqsadida unga tashqaridan aralashib, suv nasosi orqali 963,9 ming kVt•soat elektr energiyasidan noqonuniy foydalanib, davlat va jamiyat manfaatlariga jami 867,2 mln so‘m zarar yetkazganliklari aniqlangan.
Shu kabi, Departamentning O‘zbekiston tumani bo‘limi tomonidan o‘tkazilgan nazorat tadbirida fuqaro S.M. davlat ro‘yxatidan o‘tmasdan ohak ishlab chiqarish sexi tashkil etib, qo‘lbola yondirgichlarni tabiiy gaz tarmog‘iga o‘zboshimchalik bilan ulab, jami 289,1 mln so‘mlik tabiiy gazdan noqonuniy foydalanganligi aniqlangan.
Departamentning Baliqchi tumani bo‘limi tomonidan “O‘zenergoinspeksiya” viloyat boshqarmasi va “Hududgaz Andijon” GTF xodimlari bilan hamkorlikda o‘tkazilgan tekshiruvda YATT A.Yu. “Sho‘r” MFY hududida joylashgan ishlab chiqarish sexini umumiy foydalanishdagi tabiiy gaz tarmog‘iga o‘zboshimchalik bilan ulab, jami 236,5 mln so‘mlik tabiiy gazdan noqonuniy foydalanganligi aniqlangan.
Departamentning Buvayda tumani bo‘limi tomonidan o‘tkazilgan tergovga qadar tekshiruvda esa “V.B.” MCHJ ish boshqaruvchisi M.X. MCHJ klinikasiga o‘rnatilgan elektr energiyasini hisobga olish uskunasiga tashqi ta’sir o‘tkazib, jami 83,3 mln so‘mlik mulkini talon-toroj qilgan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
348
