11-iyun kuni O‘zbekiston Energetika vaziri J.Mirzamahmudov Vena shahrida Avstriya Federal moliya vaziri o‘rinbosari A.Rayxardt bilan uchrashuv o‘tkazdi.
Unda Federal moliya vazirligi bilan hamkorlikda energetika va kimyo sohasidagi investitsiya loyihalarini muhokama qilish, yirik xorijiy kompaniyalarni moliyalashtirish, texnologik yechimlarni taqdim etish hamda loyihalar doirasida zarur uskunalarni mahalliy tadbirkorlar bilan hamkorlikda ishlab chiqarishni tashkil qilish maqsadida qator yirik kompaniyalar vakillari bilan biznes muloqot uyushtirildi.
Uchrashuvda, shuningdek, Avstriya tomonidan energetika hamda kimyo sohalarida hamkorlikning mavjud imkoniyatlarini doimiy ravishda o‘rganib borish va ilg‘or loyihalarni birgalikda amalga oshirishni monitoring qilish maqsadida O‘zbekiston - Avstriya ishchi guruhini tuzish taklifi bildirildi.
Biznes muloqot yakunida O‘zbekiston Respublikasi Energetika vazirligi va Avstriya Federal moliya vazirligi o‘rtasida o‘zaro ishchi guruh tuzishni ko‘zda tutuvchi hamkorlikni chuqurlashtirish yuzasidan Memorandum imzolandi.
Bu esa, o‘z navbatida, o‘zaro hamkorlikni qisqa muddatlarda mazmunan yangi bosqichga olib chiqishi, shubhasiz.
375
