Республикамиз Президенти Шавкат Мирзиёевнинг 2020 йил 24 январь куни Олий Мажлисга Мурожаатномасида Мамлакатимиздаги туб ўзгаришлар, ёшларга оид давлат сиёсатини янада ривожлантиришни кун тартибига қўяётгани таъкидланди. Жамиятимизда аҳоли, айниқса, ёш йигит-қизларимизнинг маънавий ва маърифий савиясини доимий юксалтириш – биринчи даражали аҳамиятга эга эканлиги, аҳоли ўртасида соғлом турмуш тарзини кенг қарор топтириш зарурати ҳақида тўхтаб ўтилди. Соғлом турмуш тарзи бу — ҳар қандай касаллик профилактикаси ва саломатлик гарови. Инсоннинг турли қирраларини ривожлантириш, муваффақиятга эришиш омилидир.
“Ўзтрансгаз” Акциядорлик жамияти Ёшлар иттифоқи Бошланғич ташкилоти, Тошкент Кимё-технология институти, Республика ихтисослаштирилган Онкология ва Радиология илмий-амалий тиббиёт маркази билан ҳамкорликда ўтказилган тадбир аҳоли ўртасида соғлом турмуш тарзини юксалтириш, ёшларнинг тиббий маданиятини оширишга қаратилгани билан аҳамиятли. Анжуман Тошкент Кимё-технология институтида ўтказилди ва бу бежиз эмас. Зеро, мазкур институт газ транспорти соҳаси учун мутахассислар етказиб берувчи, соҳа ривожи йўлида илмий изланишлар олиб борувчи илмий муассаса сифатида “Ўзтрансгаз” АЖнинг яқин ҳамкорларидан бири ҳисобланади.
“Халқаро саратонга қарши курашиш куни” муносабати билан ўтказилган тадбирда Онкологик касалликлар бугунги кунда бутун дунёда инсон саломатлигига жиддий таъсир этаётган долзарб тиббий-ижтимоий муаммо эканлигига эътибор қаратилди. Жаҳон соғлиқни сақлаш ташкилоти маълумотига кўра, бундай касалликларга чалиниш кўрсаткичи йилдан-йилга ўсиб бормоқда. Дунёда ҳар йили 16 миллионга яқин бирламчи саратон ҳолати аниқланади. Бу жуда катта ижтимоий ва глобал муаммо. 2000 йилдан буён ҳар йили 4 февраль санаси – “Бутун жаҳон саратонга қарши кураш куни” сифатида белгиланганлигининг боиси шунда.
“Ўзтрансгаз” АЖ ёш ходимлари, институт профессор-ўқитувчилари ҳамда талаба ёшлар иштирок этган учрашувда РИА ва РИАТМ бўлим бошлиғи Камол Искандаров онкология бўйича Республикамиздаги ҳолат, саратоннинг кўп учраётган турлари ва касаллик профилактикаси ҳақида сўз юритди. Таъкидланганидек, статистик маълумотларга кўра Республикамизда 120 минг нафардан ортиқ саратонга чалинган фуқаролар бор. 2019 йилда 23 минг нафардан кўпроқ кишида бирламчи саратон ҳолати аниқланган. Кўрсаткичларнинг ортиб бориши эса диагностиканинг ривожлангани ва аҳоли сонининг ортиши билан изоҳланмоқда.
Саратон профилактикаси ҳамда даволаш ишларини ривожлантириш мақсадида Мамлакатимиз Президенти томонидан 2017 йил 4 апрелда “2017-2021 йилларда Ўзбекистон Республикасида онкология хизматини янада ривожлантириш ва аҳолига онкологик ёрдам кўрсатишни такомиллаштириш чора-тадбирлари тўғрисида”ги Қарор қабул қилинган. Йўналишдаги ишлар мазкур хужжат асосида тизимли равишда олиб борилмоқда.
Бугунги кунда аҳолининг онкологик касалликлар тўғрисидаги хабардорлигини ошириш, касаллик профилактикаси ва беморларга юқори малакали тиббий ёрдам кўрсатиш борасида мунтазам изланишлар йўлга қўйилган. Шифокорларнинг малака ошириш учун хорижий мамлакатларга юборилаётгани ҳам бу борада муҳим қадамлардир. Тадбирда шулар ҳақида сўз борди, ҳар бир фуқаро йилига 2 марта тиббий кўрикдан ўтиши зарурлиги эслатиб ўтилди.
Анжуман иштирокчилари ўзларини қизиқтирган саволларга батафсил жавоб олдилар.
“Ўзтрансгаз” АЖ Матбуот хизмати
1793
