Taxiatosh issiqlik elektr stansiyasining 1-sonli bug‘-gaz qurilmasi 2024/2025-yillar kuz-qish mavsumiga tayyorgarlik doirasida boroskopik inspeksiyadan o‘tkazildi. Hozirda qurilma yagona energotizimga ulangan bo‘lib, barqaror ravishda elektr energiyasi ishlab chiqarmoqda.
Amerikaning “General electric” kompaniyasi bilan hamkorlikda olib borilgan inspeksiya ishlarida mutaxassislar tomonidan gaz turbinasi rotori, kompressori holati, turbinaning havo tozalovchi qurilmasi hamda yonish kamerasi ichki qismlari boroskopik nazoratdan o‘tkazildi.
Tunu kun davom etgan inspeksiya ishida korxona mutaxassislari va xorijiy vakillardan tarkib topgan 20 kishilik guruh ish olib bordi.
- Mazkur ishlardan ko‘zlangan asosiy maqsad — elektr stansiyasining bir maromda ishlashini ta’minlash, qurilmalar va uskunalarda kelib chiqishi mumkin bo‘lgan nuqsonlarning o‘z vaqtida oldini olish hamda ularning ishlash davomiyligini uzaytirishdan iborat, - deydi “Taxiatosh IES” AJ Texnik direktorining ta’mir bo‘yicha o‘rinbosari Sa’dulla Xalikov.
Ma’lumot uchun: “Taxiatosh IES” AJ Qoraqalpog‘iston Respublikasi hamda Xorazm viloyatidagi aholi xonadonlari va ijtimoiy soha obyektlarini elektr energiyasi bilan ta’minlovchi asosiy elektr stansiyalaridan biri hisoblanadi.
173
