Умумий маълумот: 2023 йил 27 ноябрь куни Сирдарё вилоятининг Ширин шаҳри ва Боёвут тумани ҳудудида Саудия Арабистонининг “ACWA Power” компанияси томонидан қурилаётган, қиймати 1,1 миллиард АҚШ доллари, жами қуввати 1500 МВт бўлган замонавий иссиқлик электр станциясининг дастлабки босқичи (500 МВт) тармоққа уланган эди. “Mitsubishi” (Япония) компаниясининг дунёдаги энг замонавий ва энергия тежамкор газ турбиналари ўрнатилаётган мазкур электр станциясининг навбатдаги 500 МВт қуввати 2023 йил декабрь ойида ишга туширилди.
2024 йил 2-3 май кунлари ўтказилаётган III Тошкент халқаро инвестиция форуми доирасида ушбу электр станциясининг навбатдаги 500 МВт қисми ишга туширилди ва у тўлиқ қувватда ишлай бошлади.
Станциянинг ишга тушиши нима беради?
Станция тўлиқ ишга туширилгач, аввало, йилига 12 млрд кВт·соат электр энергияси ишлаб чиқаради.
Бу ҳажмдаги электр энергияси юртимиздаги 5 миллионта хонадоннинг бир йиллик ёки барча аҳоли истеъмолчиларининг қарийб 8 ойлик истеъмолини қоплаш имконини беради.
Қолаверса, унда энг замонавий, энергия тежамкор технологиялар ўрнатилиши ҳисобига йилига 1,1 млрд кубометр табиий газ тежалади.
Ушбу ҳажмдаги табиий газ эса 393 минг хонадоннинг бир йиллик истеъмолини ташкил қилади.
Бу эса жами табиий газ истеъмолчиларининг 10 фоизи деганидир.
Яна бир аҳамиятли жиҳати, станцияни қуриш юмушлари давомида бу ерда 2 минг нафаргача, лойиҳа тўлиқ қувват билан ишга тушгандан кейин эса 120 та янги иш ўрни яратилади.
Бу мазкур фурсат мобайнида ўртача 12 минг нафар одамнинг ҳаёти фаровонлашди, демакдир.
Эслатиб ўтамиз, ушбу инвестиция лойиҳаси Ўзбекистон Республикаси Президентининг 2020 йил 10 августда имзоланган “Сирдарё вилоятида қуввати 1 500 МВт бўлган янги иссиқлик электр станцияси қурилишини ташкил этиш чора-тадбирлари тўғрисида” ПҚ-4799-сонли қарори асосида амалга оширилмоқда.
Таъкидлаш жоизки, мазкур йирик ҳажмдаги лойиҳа Саудия Арабистонининг “ACWA Power” компанияси томонидан тўғридан-тўғри инвестицияларни давлат кафолатисиз жалб қилиш ҳисобига амалга оширилмоқда.
100
