2024-yil 24-iyul kuni Oliy Majlis Qonunchilik palatasining Sanoat, qurilish va savdo masalalari qo‘mitasi tomonidan Energetika vazirligining “Barqaror rivojlanish maqsadlarini izchil amalga oshirish bo‘yicha sohada tizimli ishlarni tashkil etish hamda 2030-yilgacha bo‘lgan davrda barqaror rivojlanish sohasidagi milliy maqsad va vazifalarning bajarilishi borasida amalga oshirilayotgan ishlar to‘g‘risida”gi axboroti eshitildi.
Ta’kidlanganidek, so‘nggi yillarda mamlakatimizda barqaror rivojlanish maqsadlari sohasidagi milliy maqsad va vazifalarning ijro etilishiga alohida e’tibor qaratilib, bu borada tizimli ishlar olib borilmoqda. BRMning “Arzon va toza energiya” maqsadi bo‘yicha aholini barqaror energiya resurslari bilan ta’minlash borasida qator ishlar amalga oshirilmoqda.
Xususan, joriy yilning o‘tgan davrida issiqlik elektr stansiyalari va markazlarida 34,6 mlrd, gidroelektr stansiyalarda 4,1 mlrd, blok stansiyalarda 760,6 mln, shamol elektr stansiyalarida 1,6 mlrd. kVt.soat energiyasi ishlab chiqarildi. Bunda qayta tiklanuvchi energiya manbalari ulushi 9,6 foizdan 13,9 foizgacha oshdi. 2030-yilga borib qayta tiklanuvchi energiya manbalaridan ishlab chiqarilgan elektr energiyasining iste’moldagi ulushi 40 foizga yetkaziladi.
Hozirgi kunda platforma orqali olingan ma’lumotlarga binoan, respublikada umumiy quvvati 519 MVt bo‘lgan quyosh fotoelektr stansiyalari o‘rnatilgan. Ushbu stansiyalar yillik qo‘shimcha 730 mln. kVt.soat elektr energiyasi ishlab chiqarish imkoniyatiga ega. Hisoblarga ko‘ra, joriy yilning o‘tgan davrida mazkur stansiyalardan ishlab chiqarilgan 311 mln. kVt.soat elektr energiyasi o‘z ehtiyojlari uchun iste’mol qilingan.
Shuningdek, respublikada umumiy sig‘imi 1 mln. 126 ming litr bo‘lgan quyosh issiqlik kollektorlari o‘rnatilgan. Ushbu kollektorlar suv isitishda yiliga foydalaniladigan 11,5 mln. kVt.soat elektr energiyasi yoki bo‘lmasa 3,1 mln. kub metr tabiiy gazni tejash imkoniyatini yaratdi.
Axborotda qayd etilishicha, joriy yil kuz-qish davriga tayyorgarlik ko‘rish bo‘yicha belgilangan chora-tadbirlar doirasida 476 km magistral, 18750 km taqsimlovchi elektr tarmoqlari, 5 ta magistral podstansiyadagi transformator hamda 6 464 ta transformator punkti mukammal ta’mirlangan. Hududiy elektr tarmoqlari korxonalarida 959 ta har xil quvvatli transformator, 427 tonna transformator moyi, 115 tonna sim, 483 km kabel, 72 ming dona boshqa turli xil zaruriy ehtiyot qismlardan iborat avariyaviy zaxira yaratilgan.
Shuningdek, yoqilg‘i-energetika sohasini raqamlashtirish borasida ham qator ishlar amalga oshirilmoqda. Jumladan, Yagona integrator “Uzinfocom” va O‘zenergoinspeksiya bilan birgalikda yoqilg‘i-energiya resurslarini ishlab chiqarish, qazib olish, qayta ishlash, uzatish (tashish), saqlash, taqsimlash va iste’molchilarga yetkazish, ularni miqdor jihatidan saqlash jarayonini monitoring va nazorat qiluvchi “Energonazorat” platformasi Qashqadaryo viloyatida tajriba tariqasida ishga tushirildi.
Tadbirda deputatlar tomonidan Qonunchilik palatasida joriy yil iyul oyida sohani tartibga solishga qaratilgan – “Energiyani tejash, undan oqilona foydalanish va energiya samaradorligini oshirish to‘g‘risida”gi, “Elektr energetikasi to‘g‘risida”gi Qonunlar qabul qilingani ta’kidlanib, energiya tejamkor va samarali zamonaviy texnologiyalarni bosqichma-bosqich joriy etish, aholiga ko‘rsatilayotgan xizmatlar sifatini yanada yaxshilash, sohada olib borilayotgan ishlarni jadallashtirish bo‘yicha takliflar ilgari surildi.
Yig‘ilish yakunida kun tartibidagi masala yuzasidan tegishli qaror qabul qilindi.
275
