Ayni kunlarda ob-havoning keskin isishi natijasida elektr energiyasiga bo‘lgan talab odatdagidan ko‘ra ko‘proq bo‘lyapti. Misol uchun, iste’molchilar sovitish qurilmalaridan keng foydalanishmoqda va bu zarurat. Biroq, bu jarayonda elektr energiyasidan imkon qadar tejamkorlik bilan hamda oqilona foydalanish – elektr ta’minoti barqarorligiga katta hissa qo‘shadi.
Shu maqsadda, Energetika vazirligi huzuridagi “O‘zenergoinspeksiya” tomonidan iste’molchilarning elektr energiyasidan samarali va oqilona foydalanishlarini ta’minlash maqsadida doimiy ravishda targ‘ibot tadbirlari o‘tkazilmoqda.
E’tiborlisi, poytaxtimizning markaziy ko‘chalarida reklama monitorlari mavjud bir tadbirkor yaxshi tashabbus va taklif bilan chiqdi. Unga ko‘ra, o‘ziga tegishli reklama monitorlaridan kunduz kunlari foydalanmasligini, mijozlaridan faqatgina kech tushgan paytda buyurtma olayotganini ta’kidladi. Uning so‘zlariga ko‘ra, energiya ta’minoti masalasi barchaga tegishli bo‘lib, bu jarayonda u ham o‘z hissasini mana shu yo‘l bilan qo‘shishini o‘zining insoniy burchi deya ta’kidladi.
Bu, eng avvalo, tarmoqlarda yuklamalarning ortib ketishini oldini olishga, natijada iste’molchilarni energiya resurslari bilan barqaror ta’minlashga xizmat qiladi.
Ammo ayrim iste’molchilarimizning energiya resurslaridan behuda foydalanish holatlariga duch kelmoqdamiz. Misol uchun, ba’zi savdo do‘konlarida eshik ochilgan holda konditsioner qurilmasini ishlatib qo‘yish yoki kunning yorug‘ vaqtida ham yoritish chiroqlarini o‘chirib qo‘ymaslik holatlarini uchratish mumkin.
Ma’lumki, qonunchilikda elektr energiyasini behuda sarflash, ya’ni, muntazam ravishda zarurat bo‘lmagan hollarda foydalanish (kunning yorug‘ vaqtida chiroqlarni behuda yoqib qo‘yish) yoki yoritish uchun elektr energiyasidan xo‘jasizlarcha foydalanish holatlari uchun javobgarlik mavjud.
Hurmatli iste’molchilar, elektr energiyasidan imkon qadar tejamkorlik bilan foydalanishingizni, zarur bo‘lmaganda esa, elektr qurilmalarini tarmoqdan ajratib qo‘yishingizni so‘raymiz.
323
