Energetika vazirligining 26-iyul sanasida soatlik va kunlik elektr energiyasi iste’moli rekordi yangilangani haqidagi xabarida keltirilgan faktlar noto‘g‘ri talqin qilinayotgan holatlar uchramoqda.
Xususan, bir qator telegram kanallarida biri-biridan ko‘chirib bosilayotgan postlarda yuqoridagi materialda keltirilgan ma’lumot — 26-iyul Toshkent shahrida soat 11 dan soat 17 gacha ayrim iste’molchilarga kiritilgan qisqa muddatli vaqtinchalik cheklovlar haqidagi fakt «Elektr energiyasi 11 dan 17 gacha o‘chiriladi» mazmunida noto‘g‘ri talqin qilinmoqda.
Qolaversa, ayrim saytlar ham rejali o‘chirishlar haqida yozmoqda.
Qat’iy ta’kidlaymizki, ertaga yoki keyingi kunlarda ham soat 11 dan soat 17 gacha elektr energiyasini o‘chirish rejalashtirilmayapti.
Qadrli yurtdoshlar, Energetika vazirligi hech bir hududda bu kabi o‘chirishlarni rejalashtirmayapti. Xabarda faqat kelgusida kuzatilayotgan issiqlik fonida qaysidir hududda ortiqcha yuklama tufayli avariya holati yuzaga kelish ehtimoli paydo bo‘lsa, o‘sha tarmoq yoki transformator toki sovib olguniga qadar qisqa muddat tarmoqdan uzib turilishi mumkinligi aytilgan.
Alohida qayd etamizki, ayni kunlarda ham generatsiya bo‘yicha hech qanday tanqislik yo‘q va bu bo‘yicha majburiy o‘chirishlar ko‘zda tutilmagan. Yuqoridagi materialda aytilganidek, energotizimda talabdan ortiq 1300 MVt zaxira quvvatlari mavjud.
Jurnalistlar hamda blogerlardan faktlarni noto‘g‘ri talqin qilmaslikni, mabodo qandaydir tushunmovchiliklar bo‘lsa, vazirlik Axborot xizmati vakillari bilan @hasan_tosh yoki @ObidjonDilmurodov akkauntlari orqali bog‘lanib, masalaga oydinlik kiritib olishlarini so‘raymiz.
214
