Ўзбекистон Республикаси Энергетика вазирлиги ва унинг тизимидаги ташкилотларнинг асосий вазифаларидан бири аҳолини газ ва электр энергияси билан таъминлашдир. Ушбу жараёнлар қандай йўлга қўйилганлигини Aндижон вилояти Балиқчи тумани мисолида кўриш мумкин.
Балиқчи туманидаги “Доғистон”, “Файзиобод”, “Aълам” ва “Юзчинор” маҳалла фуқаролар йиғинлари (МФЙ) хонадонларини табиий газ билан таъминлаш борасидаги маълумотлар аввалроқ “Ҳудудгаз Андижон” МЧЖ томонидан ҳам тақдим этилган эди.
Хусусан, юқоридаги маҳаллалар марказий газ таъминотини улаш қийин бўлган ҳудудлардан бирида жойлашган бўлиб, барча МФЙлар истеъмолчилари бугунги кунда “Балиқчитумангаз” филиали томонидан суюлтирилган газ билан таъминланиб келинмоқда ва таъминланиш даврийлиги ўртача 40-45 кунни ташкил этади.
Туманнинг “Аълам” МФЙ ўрамидаги 7 та кўчада истиқомат қилувчи 611 та аҳоли хонадонларида жами 660 дона маиший газ баллонлари мавжуд. Январь ойида мазкур МФЙ истеъмолчиларига режага кўра 7900 кг суюлтирилган газ етказиб берилиши керак бўлса, амалда бу кўрсаткич 10 700 кг ташкил қилмоқда.
Туманнинг “Доғистон” МФЙнинг 350 та хонадони 366 маиший газ баллонлари билан таъминланган бўлиб, ушбу маҳаллага 8-9 январь кунлари 4600 кг суюқ газ келтирилган. “Файзиобод” МФЙ истеъмолчилари учун “Балиқчитумангаз” филиали томонидан 11-14 январь кунлари 5 600 кг суюлтирилган газ 315 та хонадонга етказилган. “Юз чинор” МФЙ ҳам 4400 кг газ январь ойининг 15-17-саналарида махсус автотранспорт воситаларида тарқатилган. 362 та хонадоннинг барчаси тўла суюлтирилган газ билан таъминланган.
Шунингдек, ушбу тумандаги юқорида номи қайд этилган маҳаллаларнинг электр таъминотини яхшилаш мақсадида ишчи гуруҳ ташкил қилиниб, “Аълам” МФЙ даги “Остона” ва “Қўштерак” кўчаларида 28 дона темир бетон таянч ўрнатилиб 1,5 км Сип кабелларини тортиш ишлари олиб борилмоқда.
Шу жумладан, ишчи гуруҳ томонидан бирма-бир аҳоли билан суҳбат давомида “Аълам” МФЙ “Идрок” кўчасидаги фуқаро Мамадалиев Ойбек мурожаатига асосан 2 дона темир бетон таянч ўрнатилди ҳамда 45 метр жойга СИП кабел тортилди.
“Доғистон” МФЙ даги “Зобитлар” ҳамда “Юзчинор” МФЙ даги “Бирлашган” кўчаларига 15 дона темир бетон таянч олиб келинди уларни ўрнатиш ишлари олиб борилди ва тармоқ тортиш учун ҳаво тармоқлари тартибга келтирилди.
“Юзчинор” МФЙнинг “Қирқчинор” кўчасидаги 3 дона хонадоннинг электр симлари яроксиз ҳолатда бўлган тармоғи учун 100 метр СИП кабел тортилиб сифатли электр энергияси етказиб берилмоқда.
“Файзобод” МФЙ ҳудудидаги Қўштепасарой нимстанциясининг Ф.Қаҳрамон ҳаво тармоғиға уланган трансформатор пунктида аниқланган камчиликлар ва носозликлар бартараф этилди ҳамда жорий таъмирланиши таъминланди.
“Андижон ҳудудий электр тармоқлари корхонаси” акциядорлик жамияти томонидан электр энергияси етказиб берилишини таъминлашга қаратилган барча имконият даражасидаги чоралар кўрилди ва назоратга олинди.
Кўмир маҳсулотларини етказиб бериш бўйича:
Андижон вилоятида аҳолига кўмир маҳсулотларини етказиб бериш учун 7 та кўмир омборлари фаолият олиб бормоқда ва 7 та автоюклагич, 6 та юк автотранспорти, 7 та автотарозидан фойдаланилади.
Куз-қиш мавсумида вилоят аҳолисига 181,2 минг тонна (кўмир омборларида 22,1 минг тонна кўмир заҳираси яратилган) кўмир маҳсулотлари етказиб берилди, шу жумладан импорт кўмирни етказиб бериш ҳам йўлга қўйилган бўлиб, Қозоғистонлик ҳамкор томонидан 25,6 минг тонна ҳамда Қирғизистондан вилоят хусусий тадбиркорлари томонидан 72,5 минг тонна юқори калорияли ва сифатли кўмир олиб келинди.
Ушбу олиб келинган кўмир маҳсулотларидан Балиқчи тумани аҳолиси учун 8,5 минг тоннаси тарқатилди, шу жумладан Доғистон МФЙга – 122,7 тонна, “Юзчинор” МФЙга – 109,7 тонна, “Файзобод” МФЙга – 125,7 тонна ва “Аълам” МФЙга – 270,2 тонна. Туман аҳолиси учун хизмат курсатаётган Избоскан кўмир омборида 12,6 минг тонна кўмир заҳираси яратилди.
Ўзбекистон Республикаси
Энергетика вазирлиги Матбуот хизмати
1211
