Bugun Energetika vazirligida Davlatimiz rahbari tomonidan muqobil energiya manbalarini joriy etishni ragʻbatlantirish boʻyicha belgilab berilgan topshiriqlar ijrosiga bagʻishlangan videokonferens aloqa shaklida yigʻilish boʻlib oʻtdi.
Tadbirda Energetika vaziri J.Mirzamahmudov, Bosh prokuror oʻrinbosari Sh.Aminov, tegishli vazirlik va idoralar mutasaddilari ishtirok etdilar.
Anjumanda bugungi kunda energiya resurslaridan oqilona va tejamkorlik bilan foydalanishni zamonning oʻzi taqozo qilayotganligi taʼkidlanib, bu borada aholi xonadonlari, iqtisodiyot tarmoqlari va ijtimoiy soha obyektlarida oʻrnatilayotgan quyosh panellari hamda quyosh suv isitish qurilmalarining oʻrni gʻoyat katta ekanligi aytib oʻtildi.
Qayd etilganidek, bugungi kunda mamlakatimizda umumiy quvvati 2500 megavattdan ortiq boʻlgan 9 ta quyosh va 1 ta shamol elektr stansiyasi ishlab turibdi. Bundan tashqari, ijtimoiy soha binolari, aholi xonadonlari, tadbirkorlik subyektari hamda koʻp qavatli uylarda umumiy quvvati 551 megavatt boʻlgan kichik hajmdagi quyosh tizimlari va 1 142 300 litrli quyosh suv isitish qurilmalari oʻrnatilgani energiyadan samarali foydalanish, turli yangi xizmatlarning yaratilishi, olis aholi punktlariga energiya yetkazib berishni yaxshilash hamda elektr yuklamalarini kamaytirish evaziga qoʻshimcha infratuzilma uchun xarajatlarni qisqartirish imkonini bermoqda.
Tadbirda aytilganidek, koʻp qavatli uylar, aholi xonadonlari, iqtisodiyot tarmoqlari va ijtimoiy soha obyektlarida quyosh panellari va quyosh suv isitish qurilmalarining oʻrnatilishi tufayli kutilayotgan tabiiy gaz va elektr energiyasi iqtisodi oʻrtacha 40-45 foizni tashkil etadi. Qolaversa, bir yil davomida 1 kvadrat metrni isitishga sarflanadigan energiya resurslari miqdori tabiiy gazda 3 baravar, elektr energiyasida esa 2,6 baravar kamayadi.
Uchrashuvda quyosh paneli hamda quyosh suv isitish qurilmalarini oʻrnatgan aholi xonadonlari va tadbirkorlik subyektlariga berilgan imtiyozlar haqida ham soʻz yuritildi.
Anjumanda aholi va tadbirkorlarning bino-inshootlariga energiya tejamkor uskunalar hamda quyosh panellarini oʻrnatish borasidagi ishlar tanqidiy muhokama qilindi.
Yigʻilishda tizimda yoʻl qoʻyilayotgan kamchiliklar, energotejamkor uskunalardan foydalanish orqali iqtisod qilish boʻyicha kelgusida bajarilishi lozim boʻlgan ishlar yuzasidan zarur chora-tadbirlar belgilab olindi.
416
