Avval xabar qilganimizdek, shu kunlarda Energetika vazirligi hamda tizim tashkilotlari mutasaddilari Davlatimiz rahbarining tegishli topshiriqlari asosida respublikamizdagi barcha tumanlar va shaharlar hokimlari ishtirokida hududlardagi mavjud muammolarni oʻrganish hamda ularning yechimini topish maqsadida videokonferens aloqa shaklida yigʻilishlar oʻtkazmoqda.
Bugun Andijon, Qashqadaryo, Navoiy, Samarqand va Sirdaryo viloyatlari tumanlar hamda shaharlar hokimlari bilan muloqot qilindi.
Yigʻilishda har bir hududning mutasaddisi yoqilgʻi-energetika sohasida oʻz hududidagi mavjud muammolar haqida qisqacha tushuntirish berdi. Ularning yechimi sohaning malakali mutaxassislari ishtirokida chuqur tahlil qilindi.
Tadbirda asosiy eʼtibor kuz-qish mavsumiga hozirlik koʻrish, hududlarda energiya tejamkor elektr jihozlarini koʻpaytirish, aholi xonadonlari va tadbirkorlik subyektlariga elektr energiyasi hamda tabiiy gaz yetkazib berishda barqarorlikka erishish, mahallalardagi eski va oʻz xizmatini oʻtab boʻlgan simyogʻochlar, transformator punktlarini yangilash, tabiiy gaz oʻtkazilmagan xonadonlarni suyultirilgan gaz bilan taʼminlashda vujudga kelayotgan muammolarga barham berish, tumanlarda avtomobillarga yoqilgʻi quyish shoxobchalari hamda metan zapravkalar sonini koʻpaytirish, kuz-qish mavsumida ularning uzluksiz ishlashini taʼminlash singari dolzarb masalalarga qaratildi.
Yakunda vazirlik va tizim tashkilotlari mutasaddilari tomonidan qator takliflar bildirilib, yechimini kutayotgan masalalar yuzasidan aniq vazifalarni koʻzda tutuvchi “yoʻl xaritasi” ishlab chiqildi.
307
