Президент Шавкат Мирзиёевнинг Олий мажлисга Мурожаатномасида Ёшларнинг жамиятдаги ўрнини юксалтириш, ижодкорлигини ривожлантириш борасида фикр-мулоҳазалар билдирилган эди. Пойтахтимиздаги “Китоб олами” марказида “Ўзтрансгаз” АЖ Ёшлар иттифоқи бошланғич ташкилоти фаоллари иштирокида "Ёшлар маънавиятини ошириш ва китобхонликка йўналтириш" мавзусида ташкил этилган маънавий-маърифий тадбир ана шу фикрларга ҳамоҳанг тарзда ўтказилди.
Учрашувда Ўзбекистон давлат драма театри актрисаси Муҳаббат Абдуллаева, "Маърифат" тарғиботчилар жамияти аъзоси, Юридик университет профессори Феруза Муҳиддинова, Республика Маънавият ва маърифат маркази мутахассислари Мухтасар Қодирова, Ҳилолахон Иброҳимова, ёш шоира Шохсанам Нишоновалар иштирок этиб, бугунги кун ёшлари, уларнинг ҳаёти ва қизиқишлари, хусусида фикр алмашилди.
Учрашувда сўзга чиққанлар тарихсиз келажак бўлмаслиги, ўтмишда яшаб ўтган жаҳонга машҳур аждодларимизнинг ибратли ҳаёт йўли, беқиёс ижодий меросини янада чуқур ўрганиш ва кенг тарғиб этиш муҳим вазифалардан эканлигини таъкидлашди. Инсон маънавиятини юксалтирувчи омиллар, хусусан китобнинг ҳаётимиздаги аҳамияти, жамиятда муносиб ўринга эга бўлиш учун эътибор қаратилиши керак бўлган жиҳатлар ҳақида сўз юритилди. Театр артисти саҳналаштирилаётган янги асарлар ва образлар аҳамияти ҳақида сўз юритди. Унинг ижросидаги монологлар, шоира қизнинг ўз ижодидан ўқиб эшиттирган шеърий мисралари йиғилганларда таассурот қолдирди.
Тадбир якунида фаол ёшлар китоблар оламига ташриф буюриб, ўзлари учун қизиқарли бўлган китобларни харид қилдилар.
“Ўзтрансгаз” АЖ Матбуот хизмати
1078
