Xabaringiz bor, 2023-yilda “Issiqlik elektr stansiyalari” AJ tomonidan poytaxtimizning Chilonzor tumanidagi “Oqtepa” va “Bog‘zor” mahallalari hududida kogeneratsiya qurilmasi ishga tushirilgan. Qurilma barqaror ishlamoqda va hozirga qadar u orqali 17 mln kVt·soat elektr, 24 ming Gkal·soat issiqlik energiyasi ishlab chiqarildi.
Ma’lumki, 2022-yilning qish mavsumida kuzatilgan anomal sovuq ob-havo sabab ayrim hududlarning issiqlik ta’minotida uzilishlar ro‘y berdi. Chilonzor tumanining Oqtepa va Bog‘zor mahallalaridagi vaziyat ular isitish tizimining so‘ngi nuqtasida joylashgani uchun boshqa hududlar bilan solishtirganda bir muncha murakkab edi.
Hududda Prezidentimiz topshirig‘i asosida bu kabi holat qayta takrorlanishining oldini olish maqsadida bir vaqtning o‘zida ham issiqlik, ham elektr energiyasi ishlab chiqaradigan kogeneratsiya qurilmasi ishga tushirildi.
Mazkur qurilma soatiga 4,6 MVt elektr energiyasi hamda 29 Gkaldan ortiq issiqlik energiyasi ishlab chiqarish quvvatiga ega. Foydali ish koeffitsienti esa 85 foizni tashkil etadi. Bu yerda Germaniyadan keltirilgan gaz-porshenlar hamda “Bosch” qozonlari ishlamoqda. Ular orqali yiliga jami 41 mln kVt·soat elektr energiyasi va 219 ming Gkal issiklik energiyasi ishlab chiqariladi.
“Issiqlik elektr stansiyalari” AJ tomonidan Turkiyaning “Iltekno” kompaniyasi bilan amalga oshirilgan loyiha doirasida qozonxonadan iste’molchilargacha bo‘lgan barcha issiqlik ta’minoti infratuzilmasi rekonstruksiya qilindi. Issiqlik magistrali almashtirildi, har bir turarjoy binosi va ijtimoiy obyektlarda alohida issiqlik taqsimlash punktlari o‘rnatildi. Jami 13 ming metr uzunlikdagi issiqlik tarmoqlari yangi, izolyatsiyali quvurlarga almashtirish hisobiga to‘liq yopiq tizimga o‘tkazildi va yo‘qotishlardan himoya qilindi.
Loyihaning yana bir e’tiborli jihati – issiqlik taqsimlash punktlari maxsus datchiklar bilan jihozlangan. Havo sovib yoki isib ketishiga qarab, uy ichidagi harorat mo‘tadil saqlab turiladi. Majmua ishga tushirilishi natijasida yiliga 5,3 million metr kub tabiiy gaz iqtisod qilinishiga erishilyapti. Atmosferaga chiqadigan ifloslantiruvchi moddalar 67 foiz kamaygan. Oqova suv tashlanmalari esa umuman yo‘q.
Malumot uchun, ayni kunlarda “Issiqlik elektr stansiyalari” AJ tomonidan poytaxtimizning Olmazor tumanida ham 1 MVt elektr, 6 Gkal issiqlik energiyasi ishlab chiqarish quvvatiga ega zamonaviy kogeneratsiya qurilmalarini qurish ishlari olib borilyapti.
“Issiqlik elektr stansiyalari” AJ Matbuot xizmati
111
