Xabaringiz bor, bugun va ertaga mamlakatimizda Oʻzbekiston Respublikasi Vazirlar Mahkamasining 2024-yil 19-avgustdagi 534-F-son farmoyishiga asosan, “Mahalla obod – yurt obod” shiori ostida umumxalq xayriya hashari boʻlib oʻtadi. Undan koʻzlangan maqsad mahallalar, aholi turar joylari, xiyobonlar, istirohat bogʻlari, ziyoratgohlar hamda qabristonlar va boshqa joylarni obodonlashtirishdan iborat.
Bugun Oʻzbekiston Respublikasi Energetika vazirligi hamda tizim tashkilotlari jamoalari ham xalqimizning odamlarni mehr-oqibatga, hamjihatlikka chorlovchi mazkur azaliy qadriyatida faol ishtirok etdilar.
Xususan, Vazirlik ishchi-xodimlari poytaxtimizning Kichik halqa yoʻli va Taraqqiyot koʻchalariga tutash ulkan yashil hududni tozalash hamda obodonlashtirish ishlarida jonbozlik koʻrsatdilar.
Bu yerda maydon supurilib, xas-xashaklar, turli hajmdagi toshlar va axlatdan tozalandi. Yigʻilgan chiqindilar hududdan chiqarib tashlandi. Daraxtlarga shakl berilib, oqlandi, qurib qolgan shoxlari arralab olib tashlandi. Yoʻl chetida ariq ochilib, uning ikki tarafiga anvoyi gullar ekildi.
– Ertalab bu maydonni koʻrib, vahmim kelgandi, – deydi vazirlik boʻlim boshligʻi Ramiz Rahimov. – “Koʻz qoʻrqoq, qoʻl botir” deganlari shu-da. Mana, ishimiz yakunida ajoyib yashil hududga boqib, koʻzimiz quvnayapti.
Bugun, shuningdek, mamlakatimiz yoqilgʻi-energetika sohasi vakillari tomonidan mahallalar hududlari, guzarlar, koʻchalar, muqaddas qadamjolar, ziyoratgoh va qabristonlarni tartibga keltirish ishlari amalga oshirilmoqda. Yolgʻiz qariyalar, nogironlar, boquvchisini yoʻqotgan hamda kam taʼminlangan oilalardan xabar olinib, ularga moddiy va maʼnaviy yordamlar koʻrsatilyapti.
Bu esa, tabiiyki, ming yillar mobaynida kishilar oʻrtasidagi bir-biriga oʻzaro yordam berish, insonparvarlik, olijanoblik, saxovatpeshalik kabi ezgu tuygʻularni yoshlar ongiga teran singdirishga xizmat qilishi, shubhasiz.
90
