Ўзбекистон Республикаси Энергетика вазирлиги делегацияси 2020 йил 13 февралда Туркиянинг Истамбул шаҳрида бўлиб ўтган «Қайта тикланадиган энергия истиқболлари: Туркия, Марказий Осиё, Кавказ ва Ғарбий Болқонда молиялаш, инвестициялар, тартибга солиш ва янги технологиялар» мавзусидаги анжуманда иштирок этди.
Хусусан, «Қайта тикланадиган энергия манбаларидан фойдаланишнинг минтақавий истиқболлари» мавзусидаги панелли сессия доирасида энергетика вазирининг ўринбосари Шерзод Ходжаев Туркия, Грузия, Сербия, Озарбайжон, Шимолий Македония, Қозоғистон вакиллари билан бирга мунозарада иштирок этди. Мутахассислар қайта тикланадиган энергия манбаларининг ривожланиши, уларнинг энерготизимга ва трансчегаравий ҳамкорликка таъсирини муҳокама қилди.
Конференцияда иштирок этиш доирасида Ўзбекистон вакиллари томонидан бир қатор учрашувлар ва музокаралар ўтказилди. Хусусан, Туркиянинг энергетика ва табиий ресурслар вазирининг ўринбосари Алпарслан Байрактар билан учрашув бўлиб ўтди. Мулоқот давомида Ўзбекистон томонидан Туркиянинг электр энергетика соҳасини ислоҳ қилиш бўйича муваффақиятли тажрибасини ўрганишга қизиқиш билдирилди. Туркия томонидан Энергетика соҳасини ислоҳ қилиш борасида ўзаро ҳамкорлик тўғрисидаги меморандумни имзолаш тўғрисидаги таклиф келиб тушди.
Шунингдек Истамбулда делегация аъзолари EPİAŞ/EXIST компанияси фаолияти билан танишди. У бозор оператори бўлиб, шунингдек энергетика биржаси вазифасини ҳам бажаради. 2015 йил март ойида ташкил қилинган ушбу компания фаолиятининг асосий тури энергетика бозорини режалаштириш, яратиш ва уни бошқариш билан боғлиқ.
Музокаралар давомида томонлар келгуси ҳамкорлик ва тажриба алмашиш имкониятларини муҳокама қилди. Ўзбекистон делегацияси Туркия энергетика секторининг ривожланиши ва ислоҳ қилиниши тажрибаси, шунингдек ижобий амалиёт ва юзага келган саволлар билан таништирилди. Шунингдек бозорнинг жорий моделлари ва электр энергетика секторининг ривожланиши истиқболлари ҳақида маълумот берилди.
Сафар давомида делегация Анқара шаҳрига ташриф буюрди, у ерда Миллий диспетчерлик маркази фаолияти билан таништирилди. Марказ раҳбариятининг вакиллари унинг ташкил қилиниши, фаолият юритиши, SCADA тизимининг жорий қилиниши, юкламани диспетчеризация қилишнинг техник жиҳатлари ва трансчегаравий ҳамкорлик ҳақида сўзлаб берди. Икки мамлакат мутахассислари техник диспетчеризация ҳамда диспетчеризация вазифасини трансмиссиядан ажратиш зарурияти ҳақида сўзлаб берди.
Шунингдек Анқарада Ўзбекистон делегацияси аъзоларининг Туркия Энергетика бозори регулятори (EPDK/EMRA) раиси ва вакиллари билан учрашув бўлиб ўтди. 2001 йилда ташкил қилинган тузилма Туркиянинг бош давлат органи ҳисобланади. Таъкидландики, EMRA – бу мустақил давлат муассасаси, энергетика бозорларини объектив бошқаришнинг ажралмас элементи ҳисобланади.
EMRA мажбурияларига қуйидагилар киради: компанияларнинг энергетика бозорларидаги фаолияти, ҳуқуқ ва мажбуриятларини белгиловчи лицензияларни бериш; компаниянинг бозор кўрсаткичларини кузатиш; ишлаб чиқариш самарадорлигини белгилаш; тақсимлаш ва истеъмолчиларга хизмат кўрсатиш қоидаларини яратиш ва назорат қилиш; нархнинг шаклланиши тамойилларини белгилаш.
Учрашув давомида мустақил тартибга солувчи орган функциялари, унинг бозор ривожланишига таъсири, секторга хорижий ва маҳаллий инвестицияларни жалб қилиш масалалари муҳокама қилинди. Зарур меъёрий-ҳуқуқий базани яратиш зарурияти, тарифнинг шаклланиши ҳамда энергетика компанияларининг функциялари ва мажбурияларининг тақсимланиши масалалари муҳокама қилинди.
Ўзбекистон Республикаси
Энергетика вазирлиги Матбуот хизмати
938
