Сўнгги пайтларда автомобилларга газ тўлдириш шахобчалари учун табиий газ етказиб беришдаги айрим ҳолатларда тадбиркорлар ва газ таъминоти корхоналари орасида мансабни суистеъмол қилиш ҳолатлари, коррупцион механизмалар вужудга келмоқда. Шунингдек, Ўзбекистон Республикаси Вазирлар Маҳкамасининг 2018 йил 12 январдаги 22-сонли “Электр энергияси ва табиий газдан фойдаланиш тартибини такомиллаштиришга доир қўшимча чора-тадбирлар тўғрисида”ги қарорнинг 2-иловаси билан тасдиқланган “табиий газдан фойдаланиш қоидалари”нинг 105-бандига асосан етказиб берилиши режалаштирилган табиий газ миқдорлари ҳажмидан ортиқча олинган газ ҳажмлари учун 1,4 оширилган коэффициент тўламаслик мақсадида АГТКШлар фаолиятини вақтинчалик тўхтатиб қўйиши, бунинг натижасида ҳудудларда транспорт воситаларининг газ шахобчаларида тирбандликни келтириб чиқариб, сотилаётган сиқилган газ нарҳини оширилиши натижасида аҳолининг ҳақли эътирозлари кўпайиб бормоқда.
Бундай ҳолатларни бартараф этиш мақсадида ҳукумат томонидан амалий чоралар кўрилмоқда. Хусусан, Ўзбекистон Республикаси Вазирлар Маҳкамасининг 2020 йил 22 февраль куни бўлиб ўтган “Нефть-газ тармоғи ва газтранспорт тизимининг барқарор ишлашини таъминлаш бўйича қўшимча чора-тадбирлар”га бағишланган мажлисида юқорида айтиб ўтилган масалалар юзасидан Ўзбекистон Республикаси Бош вазири томонидан мутасадди ташкилот ва идораларга тегишли кўрсатмалар берилди.
2020 йил 1 мартдан бошлаб “Ўзтрансгаз” АЖнинг газ таъминоти бўйича ҳудудий филиаллари томонидан, Вазирлар Маҳкамасининг 2018 йил 12 январдаги 22-сон қарори талаблари, ҳамда Вазирлар Маҳкамасининг жорий йил 22 февралдаги баённомасига асосан, АГТКШлар билан улар томонидан тақдим этиладиган табиий газ буюртмасига кўра 100 фоиз миқдорида олдиндан тўловларни амалга оширилиши, лицензия шартларини тўлиқ бажарилишини таъминлаш шартлари билан “Табиий газ етказиб бериш ва қабул қилиш тўғрисида”ги шартнома (ёки шартномаларга қўшимча келишув)лар ўрнатилган тартибда имзоланишини маълум қиламиз.
Агарда, газ таъминоти филиаллари раҳбарлари ёки масъул ходимлари томонидан ноқонуний хатти-харакатлар сезсангиз “Ўзтрансгаз” АЖнинг расмий веб-сайтига (utg@.uz info@utg.uz) ёки тегишли ҳуқуқни ҳимоя қилиш идораларига хабар беришингизни сўраймиз.
“Ўзтрансгаз” АЖ Матбуот хизмати
1438
