Ўзбекистон Республикаси Энергетика вазири Алишер Султонов 2020 йил 27 февраль куни «Росгеология» АЖ бош директори, бошқарув кенгаши раиси Сергей Горьков билан учрашди.
Учрашув «Росгеология» делегациясининг Тошкентга амалга оширган бир кунлик ташрифи доирасида бўлиб ўтди. Ташриф дастурига биноан унда Ўзбекистон Республикаси Геология ва минерал ресурслар давлат қўмитаси раиси Бобир Исломов, «ИМР» институти, «Ўзбекгеофизика» ҳамда Нефть ва газ конлари геологияси ҳамда қидируви институти раҳбарияти ҳам иштиок этиб, «Росгеология» АЖ ва Ўзбекистон Республикаси Давлат геология қўмитаси ўртасида Ўзбекистон ҳудудларининг иқтисодий потенциалини ривожлантириш учун минерал хомашёлардан самарали фойдаланиш борасида ер ости бойликларидан фойдаланиш соҳасида ҳамкорлик қилиш бўйича шартнома имзоланди.
Мулоқот давомида Энергетика вазири А.Султонов таъкидлаб ўтганидек, «Бугун имзоланган шартнома ва унда белгилаб берилган йўналишлар «Росгеология» АЖ ва Энергетика ўртасидаги ҳамкорликни янги босқичга олиб чиқиш баробарида, Ўзбекистоннинг углеводородлар ва минерал хомашёлар базасини сезиларли тарзда мустаҳкамлашга, ҳудудларнинг энергия таъминоти сифатини оширишга хизмат қилади».
«Ҳамкорликда амалга оширилган ишлар доирасида ишлаб чиқариш суръатларини ошириш, шунингдек, нефть-газнинг истиқболли ҳудудларини ҳавзали, геологик ва гидродинамик моделлаштириш учун замонавий усул ва технологияларни жорий этиш мақсадида ресурс салоҳиятини баҳолаш, аниқланмаган конларни қидириш ва баҳолаш ҳамда Ўзбекистон Республикасининг углеводород заҳиралари таркибини «Росгеология» АЖ тажрибаси ва мавжуд ишланмаларини ҳисобга олган ҳолда таҳлил қилиш режалаштирилган. Республиканинг саноат хомашёси ва геологик углеводородларни халқаро талабларга мувофиқ равишда тўлиқ инвентаризация қилиш вазифаларидан келиб чиқадиган бўлсак, бу Ўзбекистоннинг нефть-газ саноати учун жуда муҳимдир», – деб таъкидлади вазир.
«Росгеология» АЖ корхоналарида Ўзбекистонлик мутахассислар учун ҳавзаларнинг замонавий услуб ва технологиялари масалалари, истиқболли нефть-газ ҳудудларнинг геологик ва гидродинамик моделлаштириш ва бошқа долзарб йўналишларда ўқув дастурлари ва малака оширишни ташкил этиш йўналишида ҳамкорликнинг катта истиқболлари борлиги таъкидланди.
Музокаралар чоғида томонлар эришилган келишувларни тезроқ амалга оширишга ва амалий ҳамкорлик суръатларини ривожлантиришга қизиқиш билдирдилар.
Эслатиб ўтамиз, 2018 йилнинг октябрида «Ўзбекнефтегаз» ва «Росгеология» АЖ томонидан ҳамкорлик бўйича келишув имзоланган бўлиб, унда Ўзбекистон ҳудудида геология қидирув соҳасида ўзаро ҳамкорлик қилиш белгиланган. Шартномани имзолаш Россия Федерацияси президенти Владимир Путиннинг Ўзбекистонга давлат ташрифи доирасида имзоланган эди.
Шартномада Ўзбекистон Республикасида геология-қидирув ишларини олиб бориш бўйича қўшма дастур ишлаб чиқиш, Россия Федерацияси, Ўзбекистон ва бошқа муайян давлатларда шу асосда геология-қидирув ишларини ташкил этиш, жумладан, углеводород конларини қидиришнинг янги услубларига, геофизика ҳамда бурғулаш ишларига қизиқиш билдирган учинчи давлатлар ҳудудида қидирув ва геология қидирув ишларининг дастлабки босқичларида қўшма инвестиция лойиҳаларини амалга ошириш кўзда тутилган.
Ўзбекистон Республикаси
Энергетика вазирлиги Матбуот хизмати
1376
