2020 йилнинг 4 март куни Ўзбекистон Республикаси Энергетика вазирлиги таркибига кирувчи “Иссиқлик электр станциялари” акциядорлик жамиятида “Янги Ўзбекистонни ёшлар билан бирга қурамиз!” мавзусидаги “Раҳбар ва ёшлар” учрашуви бўлиб ўтди.
Тадбирда “Иссиқлик электр станциялари” АЖ раҳбарияти ҳамда “Иссиқлик электр станциялари” АЖ ҳамда унинг таркибидаги “Тошкент иссиқлик электр маркази” ва “Ўзэнергосозлаш” масъулияти чекланган жамиятининг 150 нафардан ортиқ ёш мутахассислари иштирок этишди.
Учрашув Президентимиз Ш.Мирзиёев томонидан 2019 йил 27 декабрь куни Тошкент шаҳрида ёшлар билан бўлиб ўтган учрашувда ёшлар сиёсати бўйича илгари сурилган қатор ташаббуслари ижросини таъминлашга қаратилган. Давлатимиз раҳбари “Янги Ўзбекистонни, албатта, ёшлар билан бирга қурамиз. 2020 йил ёшларга оид давлат сиёсатида туб бурилиш йили бўлади” дея алоҳида таъкидлаган эди.
Учрашувда электр энергияси ишлаб чиқариш корхоналарида фаолият олиб бораётган ёшларнинг ғоя ва интилишлари, уларни қизиқтириб келаётган муаммо ва масалаларни ўрганиш, ёшларнинг ижтимоий ташаббусларини қўллаб-қувватлаш бўйича вазифалар белгилаб олинди.
“ИЭС” АЖ раҳбарияти бу каби учрашувларни очиқ мулоқот тарзида ўтказиш воситасида ёш кадрларнинг касбий малакасини ошириш, уларнинг жамоат ишларида янада фаол иштирок этишини таъминлаш, навқирон авлод вакилларининг ўз салоҳияти ҳамда ташаббусларини намойиш этишлари учун янада қулай шарт-шароитларни яратиш вазифасини ўз олдига мақсад қилиб қўйган.
“Иссиқлик электр станциялари” АЖ матбуот хизмати
3534
