“Худудгазтаъминот” АЖ таркибидаги “Ҳудудгаз Фарғона” МЧЖ томонидан Фарғона вилояти аҳолиси ва ижтимоий соҳа вакилларини бир маромда табиий газ билан барқарор таъминлаш мақсадида доимий назорат тадбирлари ўтказилмоқда.
Жорий йилнинг 24 март куни “Ҳудудгаз Фарғона” МЧЖ томонидан Ўзбекистон Республикаси Бош прокуратураси ҳузуридаги Мажбурий ижро бюроси Олтиариқ туман участкаси мутасадди вакиллари иштирокида ўтказилган навбатдаги тадбир давомида Фарғона вилояти, Олтиариқ туманида жойлашган “Истиқлол водий файз” МЧЖга қарашли иссиқхонанинг табиий газдан фойдаланиш ҳолати назорат қилинганда, ўзбошимчалик билан, истеъмолчи томонидан иссиқхонага ўрнатилган “Принц-25/40” русумли электрон газ ҳисоблагичнинг қувватига мос келмайдиган, лойиҳадан ташқари қўшимча иситиш қозонини ўрнатиб фойдаланаётганлиги аниқланди.
“Истиқлол водий файз” МЧЖ томонидан “Ҳудудгаз Фарғона” МЧЖга келтирилган зарар “Ўзнефтгазинспекция” Фарғона бўлими, Мажбурий ижро бюроси Фарғона вилоят бошқармаси ва “Ҳудудгаз Фарғона” МЧЖ ходимлари иштирокида комиссион тартибда ўрганилиб, Ўзбекистон Республикаси Вазирлар Маҳкамасининг 12.01.2018 йилдаги “Электр энергияси ва табиий газдан фойдаланиш тартибини такомиллаштиришга доир қўшимча чора-тадбирлар тўғрисида”ги 22-сонли қарори талабларига асосан, белгиланган тартибда 146 191 м3 ёки 146 191 000 сўмлик якуний қайта ҳисоб-китоб амалга оширилди.
Ҳозирда Мажбурий ижро бюроси Олтиариқ туман участкаси томонидан суруштирув ишлари амалга оширилмоқда.
Фурсатдан фойдаланиб, “Ҳудудгаз Фарғона” МЧЖ вилоят аҳолиси ва ижтимоий соҳа муассасаларини бир маромда табиий газ билан барқарор таъминлаш мақсадида доимий назорат тадбирлари давом эттирилишини маълум қилади.
“Ҳудудгаз Фарғона” МЧЖ матбуот хизмати
1008
