Республикамизда коронавирус инфекцияси тарқалишининг олдини олишга қаратилган чора-тадбирлар режасининг ижроси ва аҳолининг санитария-эпидемиологик осойишталигини таъминлаш мақсадида "Ўзтрансгаз" АЖ томонидан ҳам қатор ишлар амалга оширилмоқда. Табиий газ транспортировкасини яхшилашга қаратилган таъмирлаш ишлари шулар жумласидан.
Газ қувурларида мавжуд нуқсонли участкаларни таъмирлаш мақсадида жорий йил март ойида “БГР-ТБА” Магистрал газ қувури биринчи тармоғининг 105-121 километрлари орасидаги 16 км газ қувури таъмирга чиқарилди. Таъмир ишларида Зирабулоқ МГҚБ ходимларидан иборат меҳнат жамоаси астойдил меҳнат қилишяпти. Жараёнда “Нақлгазмахсусқурилиш” АЖнинг “Қаршигазтаъмир” филиалига тегишли махсус техникалардан ҳам фойдаланилмоқда. Ҳозирги кунгача диаметри 1020 мм бўлган 300 п/метрга яқин қувур алмаштирилди.
“БГР-ТБА” магистрал газ қувури 1 тармоғининг 123 километрида жойлашган дарё устидан ўтувчи қисмида носозлик аниқлангани сабабли, 2020 йил 1 апрель куни ушбу газ қувурининг 121-148 километри оралиғидаги қисми ҳам тўхтатилиб, таъмир ишлари бошланди. Ҳозирги кунда Зарафшон дарёсининг Оқдарё ирмоғи устидан (ҳаво орқали) ўтган 190 метр қисмида диаметри 1020 мм бўлган қувур алмаштирилмоқда. Бу ишларда “Бухорогазсаноатқурилиш” АЖ “Нефтегазмонтаж” МЧЖнинг 23 та махсус техникаси ва 60 нафарга яқин ишчи-ходимлари жалб қилинди. Қурилиш ташкилотлари томонидан 6 апрелга қадар диаметри 1020 мм бўлган 151 п/метр қувур монтаж қилинди. 5-Д ўлчамли бурчакли отвод қувурлари монтаж учун тайёрланди.
Магистрал газ қувурининг ушбу участкаларига таъмирлаш ишлари ўтказилиши натижасида Тошкент шаҳри, Тошкент вилояти ҳамда Фарғона водийси вилоятларининг аҳолиси ва саноат корхоналарини табиий газ билан таъминлаш даражаси яхшиланади. Бу шунингдек, Республикамиз газ транспорти тизимининг ишончлигигига хизмат қилади.
“Ўзтрансгаз” АЖ Матбуот хизмати
1198
