“Ҳудудгаз Фарғона” МЧЖнинг Фурқат туманида жойлашган газ тўлдириш станцияси томонидан аҳолига мунтазам ва узлуксиз суюлтирилган газни етказиб бериш борасида қатор амалий ишлар амалга оширилмоқда.
“Фурқат” газ тўлдириш станцияси вилоятнинг Фурқат туманидаги 20 234 та, Бешариқ туманидаги 33 230 та ва Ўзбекистон туманидаги 33 203 та, жами 86 667 та аҳоли хонадонларини суюлтирилган газ билан таъминлайди.
Жорий йилнинг апрель ойи давомида “Фурқат” газ тўлдириш станцияси томонидан вилоятнинг Фурқат, Бешариқ ва Ўзбекистон туманларида истиқомат қилувчи жами 86 667 та аҳоли хонадонларига 1034.2 минг тонна суюлтирилган газ етказиб бериш режаси белгиланган. Апрель ойининг ўтган 22 куни давомида 790.3 минг тонна суюлтирилган газ ўз эгаларига етказиб берилди ва даврий режа 105 фоизга бажарилди.
Мамлакатимиздаги эпидемиологик вазиятдан келиб чиқиб, “Фурқат” газ тўлдириш станциясида меҳнат қилаётган барча ишчи-ходимлар хавфсизлик ва карантин қоидаларига тўлиқ риоя этган ҳолда фаолият кўрсатмоқдалар.
Ходимлар тўлалигича ҳимоя воситалари билан таъминланиб, шахсий гигиена чоралари кучайтирилди. Бинонинг кириш қисмига қўл ювиш учун шароит яратилиб, зарур воситалар (қўл ювиш совуни, суюқ совун, антисептик гел ва бошқалар) билан таъминланди.
Ҳар куни эрталаб барча ходимлар тиббий кўрикдан ўтказилмоқда. Станция ҳудуди, бино-иншоотлари ва ходимларнинг иш жойларида кенг кўламли дезинфекциялаш ишлари олиб борилмоқда.
Шунингдек, суюлтирилган газ баллонларини ташувчи махсус автоуловлар ҳамда аҳолига етказиб берилаётган газ баллонларининг ҳар бири дезинфекция қилинмоқда.
Ходимлар ўртасида коронавирус инфекцияси тарқалишини олдини олишда лозим бўлган йўриқномалар ҳақида кундалик тарғибот ва ташвиқот ишлари олиб борилмоқда.
Бир сўз билан айтганда, ходимлар ва истеъмолчилар хавфсизлиги учун барча чоралар кўрилган ва истеъмолчиларга газ баллонларини етказиб бериш тасдиқланган режа-жадвал асосида, тўлиқ ҳажмда амалга оширилмоқда.
Шунингдек, аҳоли хонадонларини суюлтирилган газ билан таъминлашда қўшимча қулайликлар яратилди. Аввал аҳолидан маиший газ баллонлари йиғиб олиниб, бир-икки кун ичида тўлдириб олиб келиб берилган бўлса, эндиликда “айланма усул” орқали захира газ баллонлари тўлдирилган ҳолда олиб келиниб, аҳолининг тугаган газ баллонлари ўрнига-ўрин алмаштириб берилмоқда.
Карантин даврида “Ҳудудгаз Фарғона” МЧЖнинг “Фурқат” газ тўлдириш станцияси томонидан истеъмолчиларга суюлтирилган газни белгиланган меъёр ҳамда талаблар асосида, ўз вақтида етказиб бериш бўйича барча зарурий чоралар кўрилган ва ҳеч бир оила ёқилғисиз қолмайди.
Маълумот учун, аҳоли истеъмолчиларига суюлтирилган газ имтиёзли нархларда ажратилган бўлиб, 1 кг суюлтирилган газни етказиб бериш нархи 1120 сўмни, 20 кг суюлтирилган газ ёки битта маиший газ баллони нархи 22400 сўмни ташкил этади.
“Ҳудудгаз Фарғона” МЧЖ матбуот хизмати
1075
