Ўзбекистон Республикаси Олий Мажлис Қонунчилик палатаси янги таҳрирдаги “Энергиядан оқилона фойдаланиш тўғрисида”ги қонунни қабул қилди. Эндиликда товарлар (ишлар, хизматлар)нинг энергия самарадорлиги кўрсатгичларига мувофиқлигини мажбурий сертификатлаш меъёрларининг ўрнатилиши – қонунда белгиланган мажбурий талаблардан биридир.
Қонун лойиҳаси Қонунчилик палатасининг Саноат, қурилиш ва савдо масалалари қўмитаси депутатлари томонидан Ўзбекистон Республикаси Энергетика вазирлиги ҳузуридаги “Ўзнефтегазинспекция” ва “Ўзэнергоинспекция” экспертлари иштирокида тайёрланди.
Қонунда Ўзбекистон Республикаси Энергетика вазирлиги энергиядан оқилона фойдаланиш соҳасида махсус ваколатли давлат органи ҳисобланиши белгиланган. Вазирлик иқтисодиёт тармоқлари ва ижтимоий соҳа объектларида энергиядан оқилона фойдаланиш бўйича ягона давлат сиёсатини юритади.
Шунга кўра, Ўзбекистон Республикаси Энергетика вазирлиги ишлаб чиқариш жараёнларига энергия самарадор ва энергияни тежайдиган технологияларни жорий этишни рағбатлантириш механизмларини ишлаб чиқади ва тегишли мониторингни амалга оширади.
Шунингдек, иқтисодиёт тармоқлари ва ижтимоий соҳа объектларига энергия жиҳатдан самарадор ва энергия тежамкорлигини ошириш бўйича илмий-тадқиқот ишларини ташкиллаштириш, инвестиция лойиҳалари бўйича таклифлар ишлаб чиқиш ҳам вазирлик зиммасига юклатилди.
Вазирлик томонидан товарлар (ишлар, хизматлар); бинолар, иншоотлар, жумладан кўп қаватли уйларнинг энергия самарадорлиги ва энергия тежамкорлиги даражасини ўрнатиш талаблари белгиланади.
Шунингдек, энергия самарадорлиги паст маҳсулотни мамлакатимизда ишлаб чиқариш ёки Ўзбекистонга импорт қилишни чеклаш бўйича таклифлар ишлаб чиқиш ҳам вазирлик зиммасига юкланган.
Энергия истеъмолчиларини мажбурий равишда текшириш ва тегишли тавсияларнинг бажарилиши устидан мониторинг олиб борилади. Янги таҳрирдаги қонунда вазирликнинг энергиядан оқилона фойдаланиш соҳасида махсус ваколатли давлат органи сифатидаги бошқа вазифалари ҳам белгиланган.
Шунингдек, Қонунчилик палатаси томонидан қабул қилинган қонунда Ўзбекистон Республикаси Вазирлар Маҳкамаси, ушбу соҳадаги давлат назорати органлари ва жойлардаги давлат ҳокимияти органларининг энергиядан оқилона фойдаланиш бўйича ваколатлари ҳам белгиланган.
Энергиядан оқилона фойдаланиш соҳасида ягона давлат сиёсатини юритишда мажбурий ҳисобланган энергиядан оқилона фойдаланиш бўйича давлат, тармоқ ва ҳудудий дастурлар ва лойиҳаларнинг устуворлиги қонун билан белгиланган.
Улар қисқа муддатда ( бир йилдан икки йилгача), ўрта муддатда (икки йилдан беш йилгача) ва узоқ муддатда (беш йилдан ва ундан узоқроқ бўлган даврда) ишлаб чиқилади ва Ўзбекистон Республикаси Вазирлар Маҳкамаси томонидан тасдиқланади.
Шундай қилиб, янги таҳрирдаги “Энергиядан оқилона фойдаланиш тўғрисида”ги қонун энергия самарадорлиги бўйича талабларга риоя қилиш бўйича давлат назоратини амалга оширади ва энергия жиҳатдан бесамар бўлган маҳсулотни ишлаб чиқариш ва импорт қилишни чеклаш, давлат органлари ва ташкилотларнинг энергия манбаларини тежашга қаратилган.
Қонун лойиҳасини тайёрлаш жараёнида Буюк Британия, АҚШ, Япония, Франция, Германия, Украина, Россия, Қозоғистоннинг энергия тежамкорлиги ва энергия самарадорлиги, энергия истеъмолини тартибга солиш, иқтисодий ва ижтимоий соҳаларда тегишли талабларни ишлаб чиқиш ва амалга оширишга доир тажрибалари ўрганилди.
Қонунчилик палатаси томонидан қабул қилинган янги таҳрирдаги “Энергиядан оқилона фойдаланиш тўғрисида”ги қонун Олий Мажлис Сенати томонидан маъқулланиши керак, ҳужжат Ўзбекистон Республикаси Президенти томонидан имзоланганидан сўнг кучга киради.
Энергетика вазирлиги Матбуот хизмати
1635
