Энергетика вазирлиги тизимидаги “Ўзбекистон миллий электр тармоқлари” АЖ томонидан Тошкент металлургия заводининг ташқи объектларини электр энергияси билан таъминлаш лойиҳаси якунланди.
Айни пайтда техник дастурга асосан кучланиш берилиб, 115 соатли ишга қўйиш-созлаш ишлари олиб борилмоқда.
Қурилиш давомида узунлиги 2х23 (46) км бўлган 220 кВ юқори кучланишли электр тармоғи, шунингдек, энг замонавий ускуналар билан жиҳозланган “Сирғали” подстанцияси ҳам қуриб битказилди.
Ўзбекистон Республикаси Президентининг 2018 йил 29 мартдаги ҳамда Вазирлар Маҳкамасининг 2019 йил 28 июндаги тегишли қарорларига асосида “Тошкент металлургия заводининг ташқи объектларини қуришда электр энергияси билан таъминлаш” лойиҳаси амалга оширилди.
Лойиҳадан кўзланган мақсад аниқ — Тошкент шаҳар Сирғали туманида жойлашган йирик саноат корхонасининг ташқи объектларини қуришда электр энергияси билан таъминлаш ҳамда Тошкент шаҳри ва қисман Тошкент вилоятидаги истеъмолчиларни электр энергия билан узлуксиз таъминлаш жараёни ишончлилигини оширишдан иборат.
Лойиҳанинг амалга оширилиши Президентимиз томонидан белгилаб берилган маҳаллий хомашёни қайта ишлаш орқали тайёр маҳсулот ишлаб чиқариш, ички бозорни тўлдириш ва рақобатбардош маҳсулотлар экспортини таъминлаш мақсадида саноат корхоналарининг ишлаб чиқариш қувватини ошириш бўйича иқтисодиёт олдига қўйилган долзарб вазифаларни амалга оширишга хизмат қилади.
Лойиҳани амалга ошириш давомида «Қўйлиқ» ва «Адолат» подстанциялари оралиғидаги 220 кВли ҳаво линиясини кесиш орқали янги тармоқ тугуни ҳосил қилинди.
Лойиҳа доирасида қилинган ишларни батафсил таҳлил қиладиган бўлсак, пудратчи “Maxsuselektrtarmoqqurilish” қурилиш ташкилоти томонидан: 292 дона фундаментлар; 194 дона СК-26 русумли таянч устунлари; 68 дона металл конструкцияли таянч устунлари ўрнатилди ва 46,6 километр узунликдаги сим монтаж қилинди.
Бундан ташқари, пудратчи “МУ-4” қурилиш ташкилоти томонидан: 89 дона СК-22 русумли таянч устунлари ўрнатилди; 200 МВАли трансформаторни ўрнатиш ишлари якунланди; “Сирғали” подстанцияси устунлар билан тўлиқ ўралди; Насос станцияси фойдаланишга топширилди; “Сирғали” подстанциясида 110 кВли очиқ тақсимлаш ускунасининг таянчлари ўрнатилди; Оператив бошқарув пулти жойлашган ҳамда ёрдамчи функционал бинолар фойдаланишга топширилди.
“Тошкент металургия заводининг ташқи объектларини қуришда электр энергияси билан таъминлаш” лойиҳасининг умумий қиймати 29,022 млн. АҚШ доллари ҳисобида бўлиб, шундан 26,5 млн. АҚШ доллари ҳисобидаги маблағлар Ўзбекистон тикланиш ва тараққиёт жамғармаси, қолган 2,521 млн. АҚШ доллари ҳисобидаги маблағлар “Ўзбекистон МЭТ” АЖнинг ўз маблағлари ҳисобидан амалга оширилди.
Таъкидлаш лозимки, мазкур лойиҳа ҳудуди ўз ичига Тошкент шаҳрининг Сирғали туманидаги Янги Сирғали массиви, шунингдек, Тошкент вилоятининг Юқори Чирчиқ, Ўрта Чирчиқ, Қуйи Чирчиқ, Янгийўл ва Зангиота туманларини қамраб олади ва мазкур ҳудудлар тараққиёти учун хизмат қилади.
Энергетика вазирлиги Матбуот хизмати
“Ўзбекистон МЭТ” АЖ Ахборот хизмати билан ҳамкорликда
1449
