Ўзбекистонда ҳам замон талабларига мувофиқ, газ таъминоти тизимида энг илғор технологиялардан фойдаланишни жорий этиш йўлидан борилмоқда. Хусусан, жорий йилда реал вақт режимида ишлайдиган табиий газ таъминотини бошқаришнинг автоматлаштирилган ҳисобга олиш тизимини кенг жорий этиш бошланади. Бу табиий газни тўлиқ, аниқ ва ишончли ҳисобга олинишини таъминлаш, шунингдек, табиий газ таъминотидаги йўқотишларни камайтириш ва истеъмолчиларнинг тўлов маданиятини оширишга хизмат қилади.
Андижон вилоятида ҳам АСКУГ тизимини жорий этиш ва замонавий газ ҳисоблаш ускуналарини ўрнатиш ишлари бошланди. Дастлабки ускуналар Андижон шаҳридаги “Ёйилма” МФЙ ўрамидаги 1- ва 2- кўп қаватли уйлардаги 128 та ҳамда “Мустақилликнинг 20 йиллиги” МФЙ ўрамидаги “Учқўрғон” кўчасидаги 84 та хонадонга ўрнатилмоқда. Ҳар бир кўп қаватли уйнинг бир соат давомидаги газ сарфи ҳажми ва хонадондаги уй ичи газ жиҳозларнинг сони ҳисобга олиниб, турли модификациядаги замонавий газ ҳисоблаш ускуналари ўрнатилмоқда.
“Бугунги кунда “Ҳудудгазтаъминот” АЖ ва унинг тизимидаги барча газ таъминоти идораларига қўйилаётган талаб, газ истеъмоли тизимида юқори тежамкорликка эришиш, аҳоли хавфсизлигини таъминлаш каби муҳим масалалар соҳа ходимларининг асосий галдаги вазифаси ҳисобланади. Аҳоли учун яна бир қулайлик бу, мазкур ҳисоблагичларни ўрнатиб бериш мутлақо бепулдир,” - дейди “Ҳудудгаз Андижон” МЧЖ Бош директори Давронбек Салоҳитдинов. - Ушбу турдаги газ ҳисоблаш ускуналар дастлаб Тошкент шаҳри ва Тошкент вилоятидаги айрим ҳудудларда олиб борилган тажриба-синовларидан муваффақиятли ўтди. Унинг фойдаси, ҳисоблагичлар сифати ва қулайлиги билан истеъмолчиларга манзур бўлди.
Инсон омилини қисқартиришда қўл келувчи замонавий ҳисоблагичлар сим-карта ўрнатилган ҳолда истеъмолчига фойдаланишга топширилади. Сим-картанинг асосий вазифаси, ишлатилган табиий газ ҳажми ҳақидаги маълумотларни онлайн режимда марказий серверга узатиш ҳисобланади. Шу орқали маълумот биллинг тизимига автоматик равишда узатилади. Бу ўз навбатида истеъмолчиларда тўлов маданиятини ошириши билан бир қаторда тўлов тизимида шаффофликни таъминлайди.”
Ушбу ҳисоблагичларнинг яна бир қулайлиги шундаки, ишлатилган табиий газ учун қарздорлик пайдо бўлишига яқин қолганда ҳисоблагич пул тўлаш лозимлиги тўғрисида истеъмолчининг мобил телефонига автоматик тарзда хабар жўнатади ва ҳисоблагичда қарз юзага келиши билан инсон аралашувисиз газ бериш тўлов қилингунга қадар тўхтатилади. Қарздорлик туфайли газ бериш тўхтатилгач, қачонки қарздорлик тўлиқ тўлангандан сўнг, истеъмолчи уйидаги барча очиқ қолган газ кранларини беркитмагунча ҳисоблагич газни ўтказмайди. Бу тизим, турли ҳил кўнгилсиз ҳодисаларнинг олдини олиш билан бир қаторда, инсон саломатлиги ва хавфсизлиги каби олий неъматларнинг дахлсизлигини кафолатлайди.
“Истеъмолчиларга қулайлик яратиш ва карантин қоидаларига қатъий амалга қилган ҳолда, ҳужжат ва шартнома билан боғлиқ ишларни кўп қаватли уйлар олдида ташкил этдик. Ижтимоий масофани сақлаган ҳолда, зарур ҳужжатларни шу ернинг ўзида расмийлаштирмоқдамиз. Барча чилангар ва ходимлар махсус тиббий ҳимоя воситалари ҳамда антисептиклар билан таъминланганлар,” - дея хабар берди “Андижоншаҳаргаз” филиали раҳбари Хуршидбек Қодиров.
Жорий йилда Андижон вилоятида ана шундай замонавий ҳисоблагичлардан 64 минг дона ўрнатилиш режалаштирилган. Вилоятда жами 221 мингга яқин истеъмолчиларга ҳисоблагичлар бепул ўрнатиб берилади.
“Ҳудудгаз Андижон” МЧЖ Матбуот хизмати
2103
