Мамлакатимизда аҳоли сонининг кундан кунга ортиб бориши натижасида истеъмолчиларнинг табиий газга бўлган эҳтиёжи янада ортади. Фуқароларни мунтазам равишда табиий ва суюлтирилган газ билан таъминлаш ҳамда аҳолининг газ учун тўловларини амалга оширишида енгилликлар яратиш мақсадида, соҳага бир қатор истиқболли лойиҳалар киритилмоқда.
Ўзбекистон Республикаси Президентининг “Электр энергияси ва табиий газни назорат қилиш ва ҳисобга олишнинг автоматлаштирилган тизимларини жорий қилиш бўйича таклифларни тайёрлаш чора-тадбирлари тўғрисида”ги қарори ҳам айнан фуқаролар манфаатдорлигига хизмат қилмоқда.
Мазкур қарор ижросини таъминлаш мақсадида “Ҳудудгаз Сирдарё” МЧЖ томонидан аҳоли хонадонларига замонавий электрон газ ҳисоблагичлари ўрнатилмоқда. Бу орқали фуқароларнинг оворагарчилик ва сарсонгарчиликларига чек қўйилади. Боиси, ушбу электрон газ ҳисоблагичлар онлайн тарзда ишлайди.
Хусусан, унга ўрнатилган батареянинг қуввати 8 йилга етади. Кафолат муддати эса 5 йил. Энг муҳим жиҳати шундаки, ушбу ҳисоблагичлар аҳоли хонадонларига мутлақо бепул ўрнатилмоқда. Хозирга қадар вилоят бўйича 700 донага яқин замонавий ҳисоблагичлар ўрнатилди. Ушбу жараёнлар Гулистон шаҳрининг “Аҳиллик” маҳалласида ҳам давом этмоқда.
Ўзбекистонда ишлаб чиқарилаётган ушбу замонавий “ақлли” газ ҳисоблагичлари вилоят филиалларига етказиб берилмоқда. Ҳозирда, “Ҳудудгаз Сирдарё” МЧЖда ҳам керакли эҳтиёт қисмлар ва махсус асбоб ускуналар захираси шакллантирилиб, жойларга етқазилмоқда. 1-босқичда 3240 дона электрон ҳисоблагичлар туман ва шаҳар филлиалларига етказиб берилди.
Ушбу ҳисоблагичлар ҳамкор ташкилотлар билан биргаликда тасдиқланган жадвал бўйича истеъмолчиларнинг ҳонадонига 10 кун олдин огоҳлантирилгандан сўнг ўрнатилади. Аҳоли эса яратилаётган имкониятлардан мамнун.
Ҳудудлардаги МИБнинг масъул ҳодимлари ушбу газ ҳисоблаш ускуналарини алмаштиришда, тамғалашда ҳамда далолатномаларни расмийлаштиришда бевосита иштирок этади. Газ таъминоти мутаҳассислари томонидан газ сарфига мос замонавий ҳисоблагич танланади ва меъёрий талаблар асосида ўрнатиш амалга оширилади.
“Ҳудудгаз Сирдарё” МЧЖ матбуот хизмати
1722
