Жорий йилнинг 19 август куни Ўзбекистон Республикаси Энергетика вазирлигида Энергетика вазири Алишер Султонов ва Атом энергетикаси бўйича халқаро агентлик (МАГАТЭ) Бош директори ўринбосари – Ядро энергетикаси бўйича Департамент раҳбари Михаил Чудаков ўртасида учрашув бўлиб ўтди.
Учрашув Атом энергетикаси бўйича халқаро агентликнинг М.Чудаков раҳбарлигидаги делегацияси Ўзбекистонга расмий сафари доирасида ўтказилди.
Ушбу ташриф муҳим сана — Ўзбекистон Республикаси ва МАГАТЭ ўртасида ҳамкорлик муносабатлари ўрнатилганининг 25 йиллиги шарафига тадбирларни ўтказишга бағишланган.
Мулоқот давомида А.Султонов ва М.Чудаков Ўзбекистон ва МАГАТЭ муносабатларининг бугунги ҳолати ва ривожлантириш масалаларини муҳокама қилиб, ушбу ҳамкорлик чорак асрдан буён давом этиб келаётгани ва мамлакатимизда биринчи атом электр станциясини қуриш лойиҳаси амалга оширилиши муносабати билан сифат жиҳатдан янги босқичга кўтарилганини таъкидладилар.
Таъкидлаганидек, Ўзбекистон эндиликда атомдан тинч мақсадда фойдаланувчи мамлакатлар сафидан жой олган бўлиб, мазкур соҳа учун юқори малакали кадрлар тайёрлашга алоҳида эътибор қаратиши лозим бўлади.
Тошкент шаҳрида Миллий ядро тадқиқоти университети «Москва муҳандислик-физика институти» (НИЯУ МИФИ)нинг филиали ташкил этилган ва фаолиятини бошлаш арафасида бўлиб, илк талабаларни саралаб олиш муваффақиятли ўтказилди.
Айни вақтда ўзбекистонлик 60 нафар талаба Россияда мазкур олий ўқув юртининг ўзида таълим олмоқда.
Бундан ташқари, 2019/2020 ўқув йилида ўзбекистонликлар учун НИЯУ МИФИнинг магистратура босқичида таълим олиш квотаси икки мартага оширилиб, 30 ўринни ташкил этди.
Мамлакатимиз соҳа учун нафақат юқори малакали мутахассислар тайёрлаш, шунинг билан бирга, аҳоли, хусусан, болалар ва ёшларни атомдан замонавий усуллардан, юқори даражадаги хавфсизлик таъминланган технологияларни қўллаган ҳолда фойдаланилишини ҳам тушунтириб бормоқда. Жумладан, бу борада Тошкент шаҳрида Ўзбекистон Республикасининг атом технологиялари ахборот маркази фаолият кўрсатяпти.
Ташриф доирасида МАГАТЭ раҳбарияти аъзоси М.Чудаков ва Энергетика вазирининг биринчи ўринбосари — «Ўзатом» агентлиги бош директори Жўрабек Мирзамаҳмудов ўртасида учрашув ҳам бўлиб ўтди.
Мулоқотда қайд этилганидек, АЭС қурилиши лойиҳасини амалга оширишда хавфсизлик масаласи Ўзбекистон учун устувор аҳамият касб этади. Шу боисдан бу борада соҳадаги халқаро тажриба ва стандартлар фаол ўрганилмоқда, жумладан, МАГАТЭ мутахассисларининг билимларидан ҳам фойдаланиляпти.
Ҳамкорлик доирасида МАГАТЭ экспертлари иштирокида қатор тадбирлар ўтказиш режалаштирилган ва амалга оширилмоқда. Хусусан, ҳозирги вақтда 2020 йилда INIR ядро инраструктурасининг комплекс шарҳига бағишланган миссияни ўтказишга тайёргарлик кўрилаяпти. Бу борада МАГАТЭга Ўзбекистон томонидан ядро энергетика дастурини ривожлантириш ҳолатига баҳо бериш мақсадида сўров юборилган.
Ўзбекистон Республикаси
Энергетика вазирлиги ахборот хизмати
1836
