Ўзбекистон Республикаси Энергетика вазирлиги тизимидаги “Ўзбекгидроэнерго” акциядорлик жамияти Қашқадарё вилоятининг Оксу дарёсида учта гидроэлектростанцияси (ГЭС)ни лойиҳалаштириш ва қуриш учун халқаро тендер эълон қилади.
Мазкур учта гидроэлектростанциянинг қурилиши Ўзбекистондаги барқарор гидроэнергетика лойиҳасининг бир қисми ҳисобланиб, уни халқаро молиявий институтлар, хусусан, Осиё тараққиёт банки (ОТБ) томонидан амалга оширилаётган гидроэнергетика лойиҳасининг бир қисмидир.
Ўзбекистон миллий энергетика стратегиясига кўра, 2030 йилга бориб, электр энергиясининг тўртдан бири қайта тикланадиган энергия манбаларидан ишлаб чиқарилади. Стратегия ўн йил ичида 30 ГВт гача қўшимча энергия қувватлари, шу жумладан 3,8 ГВт гидроэнергетика, 5 ГВт қуёш энергиясини ва 3 ГВт гача шамол энергиясини кенгайтириш кўзда тутилади. Ушбу режалар Ўзбекистоннинг минтақавий ва халқаро энергия бозорларидаги ортиб бораётган роли билан боғлиқ.
Таъкидлаш керакки, 2019 йил октабрь ойида ОТБ Ўзбекистонда умумий ишлаб чиқариш қуввати 25 МВт бўлган гидроелектростанцияларни қуриш учун 60 миллион доллар миқдорида маблағ ажратишни маъқуллади. Лойиҳанинг умумий қиймати 75,3 миллион долларни ташкил этади, қурилишни 2023 йил охирида якунлаш режалаштирилган.
Ушбу учта гидроэлектростанциясининг умумий қуввати 24 МВтга тенг бўлади: 6 МВт – “Работ”, 8 МВт – “Чаппасуй” ва 10 МВт – “Тамсуш” ҳамроҳлик қиладиган электр узатиш тармоғи (35-110 кВ ва 22 км) ва умумий қуввати 1 МВт мини-гидроагрегатлар.
Очиқ танлов савдолари (Халқаро эълон) ОТБнинг “Бир босқич: икки конвертли” тендер савдосига мувофиқ ўтказилади ва тендер ҳужжатларида кўрсатилганидек, танлов ҳуқуқига эга бўлган мамлакатларнинг барча савдо иштирокчилари учун очиқ.
“Тендерга таклифнома” ҳақида кўпроқ маълумотни қуйидаги манзилдан олишингиз мумкин: https://minenergy.uz/ru/news/view/599
Қўшимча қиламизки, “Ўзбекгидроэнерго” AЖ 2017 йил май ойида ташкил этилган бўлиб, Ўзбекистондаги гидроэлектростанцияларнинг ишлаши учун масъул ҳисобланади. Ҳозирги кунда “Ўзбекгидроэнерго” AЖ ўрнатилган қуввати 1,853 МВтга эга 37 та электр станцияларини ўз ичига олади.
Энергетика вазирлиги Матбуот хизмати
1503
