Шу кунларда мамлакатимизда табиий газни ҳисобга олишнинг автоматлаштирилган тизимини жорий этиш доирасида янги газ ҳисоблагичларини ўрнатиш ишлари бошланди. “Ҳудудгазтаъминот” АЖ бу ҳақда кенг жамоатчилик ва истеъмолчиларга бир неча бор ОАВ орқали хабар берган.
Бироқ, огоҳлантиришлар ва ОАВ орқали тарқатилган хабарларга қарамай, табиий газ истеъмолчиларидан ҳудудлардаги газ таъминоти ташкилотларининг баъзи ходимлари томонидан янги газ ҳисоблагичларини ўрнатиш учун тўлов талаб қилинаётганлиги тўғрисидаги шикоятлар кела бошлади.
Хусусан, 2020 йил 9 июнь куни ижтимоий тармоқлар орқали фуқаро Н.Хаджиметова номидан мурожаат келиб тушди. Унга кўра, унинг турмуш ўртоғига Тошкент шаҳри “Яшнободтумангаз” филиалида чилангар бўлиб ишловчи Д.Баратов қўнғироқ қилиб, бузилган газ ҳисоблагичи ўрнига янги газ ҳисоблагич ўрнатиб беришни таклиф қилади ва ушбу хизмати учун чилангар пул сўрайди.
Газ таъминоти ташкилотлари ишчилари томонидан содир этилаётган бундай ҳуқуқбузарликларни олдини олиш ва истеъмолчиларнинг қонуний ҳуқуқ ва манфаатларини ҳимоя қилиш мақсадида, “Ҳудудгазтаъминот” АЖ бошқаруви раисининг биринчи ўринбосари А.Саидвалиев бошчилигидаги бир гуруҳ мутахассислар Хаджиметовлар хонадонига ташриф буюришди.
Хонадон соҳиблари билан суҳбатлашилди ва янги газ ҳисоблагичларни ўрнатиш қоидалари бўйича тушунтиришлар берилди. Янги ўрнатилаётган газ ҳисоблагичларига техник хизмат кўрсатиш ва тегишли харажатлар (ўрнатиш, олиб ташлаш, қиёслаш, таъмирлаш) газ таъминоти ташкилотлари томонидан амалга оширилаётгани ва истеъмолчилар фақат унинг хавфсизлиги учун жавобгар эканлиги қайд этилди. Бундан ташқари, барча керакли деталлар, хусусан қувурлар, газ фильтрлари, муруват, адаптерлар ва пайвандлаш пайчалари ва бошқа керакли деталлар газ таъминоти ташкилотлари ҳисобидан сотиб олинади.
Ушбу ҳолат бўйича “Ҳудудгаз Тошкент шаҳар” МЧЖда газ таъминоти ташкилотлари раҳбарлари иштирокида фавқулодда йиғилиш бўлиб ўтди. “Ҳудудгазтаъминот” АЖ раҳбарияти томонидан юқоридаги ҳуқуқбузарлик ҳолатига алоқадор барча мансабдор шахсларга интизомий чоралар кўрилди. “Яшнободтумангаз” филиали чилангари Д.Баратов эгаллаб турган лавозимига нолойиқ деб топилиб, ишдан бўшатилди.
Ҳурматли истеъмолчилар! Янги “ақлли” газ ҳисоблагичларни ўрнатиш БЕПУЛ ва тўлиқ газ таъминоти ташкилотлари ҳисобидан амалга оширилади. Агар бу билан боғлиқ қонунбузарликлар юзага келса, бу тўғрисида дарҳол газ таъминоти ташкилотининг 1104, 712000804 телефонлари рақамлари орқали ёки “Facebook” ижтимоий тармоғидаги “Газ таъминоти муаммоларини ҳал қилиш йўллари”, “ТЧСЖ и как с ним жить”, “Коммуналка” гуруҳлари орқали хабар беришларингизни сўрайди.
“Ҳудудгазтаъминот” АЖ матбуот хизмати
24400
