«Иссиқлик электр станциялари” АЖ Бошқаруви раиси Р.Мубаракшин бошчилигидаги ишчи гуруҳ амалга оширилаётган қурилиш-бунёдкорлик ишлари, инвестицион лойиҳалар ижросини ўрганиш, лойиҳаларни жорий этиш билан боғлиқ мавжуд муаммо ва камчиликларни жойида ҳал этиш мақсадида “Тўрақўрғон ИЭС” ва “Фарғона ИЭМ”га ташриф буюрди.
"COVID-19" пандемияси шароитида “Иссиқлик электр станциялари” АЖ таркибидаги корхоналарда 12 соатлик 15 кунлик карантин режими жорий этилган бўлиб, бунда ишчи-ходимлар учун қулай меҳнат шароитини яратиш мақсадида барча қулайликларга эга ётоқхона, 3 маҳал иссиқ овқат, жисмоний тарбия ва дам олиш масканлари ташкил этилган. Ишчи гуруҳи ўз хизмат сафарини дастлаб ишчи-хизматчилар учун яратилган ана шу шароитларни ўрганишдан бошлади.
Халқимиз учун ушбу синовли кунларда кунни-тунга боғлаб меҳнат қилаётган станциялар ходимларини қўшимча рағбатлантириш, ижтимоий шароитини яхшилаш ва соғлиғини муҳофаза этиш бўйича қўшимча кўрсатмалар берилди.
“Тўрақўрғон ИЭС” ишлаб чиқариш қувватлари барқарорлигини таъминлаш, янги ишлаб чиқариш қувватларини самарали ташкил этиш масалалари муҳокама этилди.
Шунингдек, ишчи гуруҳи томонидан ҳозирги кунда қурилиши якунланиш арафасида бўлган 2 занжирли “Тўрақўрғон ИЭС – Юлдуз” нимстанцияси ҳаво линиясининг қурилиш ишлари ўрганилди. Таъкидлаш лозимки, ҳаво линиясининг 347 та метал таянчлари тўлиқ ўрнатилган бўлиб, узунлиги 100 км бўлган узатиш кабелларининг монтаж ишлари ҳам якунига етказилган. Ҳозирги кунда “Юлдуз” нимстанциясида монтаж-созлаш ишлари амалга оширилмоқда.
Экспертларнинг фикрича, иқтисодиёт тармоқлари ва аҳолининг электр энергиясига бўлган эҳтиёжини қоплаш мақсадида бунёд этилаётган юқори кучланишли ушбу электр узатиш тармоғи Наманган ва Андижон аҳолисини сифатли электр энергияси билан таъминлашга хизмат қилиши билан аҳамиятли.
“Фарғона ИЭМ”да Япония давлати билан ҳамкорликда инвестицион лойиҳа асосида барпо этилаётган 17 МВт қувватга эга газ турбина қурилмасинида олиб борилаётган қурилиш-монтаж ишлари жараёни кўздан кечирилди. Пандемия шароитига қарамай карантин қоидаларига тўлиқ риоя этган ҳолда қурилиш майдонида меҳнат жараёни айни авжида.
- Асосий мақсадимиз ушбу инвестицион лойиҳани самарали амалга ошириш, - дейди “Иссиқлик электр станциялари” АЖ Бошқаруви раиси Р.Мубаракшин. - Мазкур қурилмани имкон қадар тезроқ, яъни йил якунига қадар қуриб битказиб фойдаланишга топшириш Фарғона вилояти аҳолисини қўшимча электр энергиясига бўлган эҳтиёжини қондиришга хизмат қилади. Шу мақсадда қурилиш ишларини янада жадаллаштиришимиз, қурилмада сентябр-октябр ойларида созлаш ишларини якунлаб бўлиш олдимизда турган устувор вазифа ҳисобланади.
Шунингдек, ишчи гуруҳи «Фарғона ИЭМ»дан 17 км узоқликда жойлашган, 7 МВт қувватга эга газ турбина қурилмасининг ишлаш жараёнини бориб кўздан кечиришди. Мазкур қурилма 2019 йилнинг декабр ойида фойдаланишга топширилган бўлиб, бугунги кунда Фарғона шаҳар аҳолисини иссиқлик энергияси ҳамда электр энергияси билан таъминлаб келмоқда.
“Иссиқлик электр станциялари” АЖ матбуот хизмати
1434
