Статистик маълумотларга кўра, энергетика соҳасида ишлаш хавфлилик даражаси бўйича тўртинчи ўринда турар экан. Чунки бу соҳа ходимларининг “рақиби” – яъни электр токининг ранги, ўзига ҳос ҳиди ва на бошқа ҳис этиш мумкин бўлган хусусияти мавжуд эмас.
Бахтсиз ҳодисларни олдини олиш бўйича “Ўзэнергоинспекция”нинг Фарғона ҳудудий бўлими томонидан бир қатор ишлар олиб борилмоқда. Жумладан, ходимларни тиббий кўрикдан ўз муддатида ўтказилиши, белгиланган тартибда ХТҚ, ТЭҚҚ, ЁХҚ бўйича билимлари синов имтиҳонидан ўтказилиши, авария ва ёнғинга қарши машғулотларни ҳақиқатда ўтказилаётганлиги, раҳбар ходимлар томонидан иш жойларини текширилиши ва шу каби тадбирларни бажарилиши, энергетика корхоналарида ходимлар билан ишлашни тўғри ташкил этилиши юзасидан доимий равишда ўрганишлар ўтказилмоқда.
Сўнгги йилларда электр энергетика соҳасида содир бўлган бахтсиз ҳодисаларни келиб чиқиш сабаблари ўрганилганда ва таҳлил қилинганда қуйидагилар маълум бўлди:
Аксарият ҳолларда бахтсиз ҳодиса оқибатида ёш ва иш амалиёти етарлича бўлмаган ходимлар ёки узоқ йиллардан буён ишлаб келаётган ва ўзига ишониб амалдаги қоидаларга риоя қилмаган ходимлар жабрланмоқда. Хусусан, бахтсиз ҳодисаларга ташкилий ёки техник тадбирларни бажарилмаслиги, етарлича ҳимоя воситалари билан таъминланмаганлиги сабаб бўлмоқда.
Ўз навбатида, “Ўзбекистон Республикаси электр станциялари ва тармоқларини техник эксплуатация қилиш Қоидалари”нинг I-бўлим 211-бандида ходимлар махсус устки ва оёқ кийимлари ҳамда ҳимоя воситалари, шунингдек, тиббиёт қутилари билан таъминланган бўлиши лозимлиги кўрсатиб ўтилган. Мазкур қоиданинг I-бўлим 208-бандида содир бўлган бахтсиз ҳодиса учун жавобгарлик хавфсизлик талабларини бажарилишини таъминламаган энергообъект раҳбарлари ва мансабдор шахсларига юклатилган. Ҳудди шу жавобгарлик ушбу қоиданинг I-бўлим 242-бандида ҳам белгилаб қўйилган.
Яъни ходимларнинг хавфсизлигини таъминлаш мақсадида уларни ҳимоя воситалари билан таъминлаш учун корхона раҳбарлари ҳамда ҳимоя воситаларидан фойдаланиб ишлаш ходимнинг вазифасига киради.
Юқоридагиларни инобатга олиб, охирги пайтларда соҳада содир бўлган бахтсиз ҳодисаларни таҳлил қилган ҳолда 2020 йил июль ойида ҳудудий бўлими томонидан электр қурилмаларида ишларни хавфсиз бажаришни ташкил этиш, хавфсизлик техникаси қоидаларига риоя қилиш ва бахтсиз ҳодисаларни олдини олиш мақсадида плакат (шиор) ишлаб чиқилди ва telegram ижтимоий тармоғи орқали тарқатилди.
Олиб борилаётган тарғибот ва ташвиқот ишлари ҳамда ўрганишлар келгусида соҳада бахтсиз ҳодисаларни олдини олишга хизмат қилади деган умиддамиз.
“Ўзэнергоинспекция” Матбуот хизмати
1940
