Қишнинг қировли кунларида кўмир энг керакли маҳсулотлардан бири саналади. Уни вақтида ғамлаб қўйилмаса, албатта, кўпгина муаммоларни келтириб чиқаради. Истеъмолчилар сотиб олган кўмир намлиги сабаб тезда ёнмаса, уларнинг фиғони фалакка чиқиши табиий. Шунда ўз-ўзидан савол туғилади: айни кунда кўмир заҳираси сақланаётган омборхоналардаги ҳолат қандай?
Бу саволга жавобни “Ўзэнергоинспекция” Сирдарё ҳудудий бўлими томонидан амалга оширилаётган ишлар замирида аниқлик киритсак. Ҳозирги кунда Сирдарё вилоятида жойлашган кўмир ёқилғиларидан фойдаланувчи жами 301 та ижтимоий соҳа объектлари мавжуд. Мазкур объектлар ҳамда аҳолига “Ўзбеккўмир” АЖ Сирдарё кўмир етказувчи филиалига қарашли “Боёвут”, “Бахт” ҳамда “Янгиер” кўмир тарқатиш омборлари орқали кўмир ва кўмир брикет ёқилғилари етказиб берилади.
Ушбу кўмир сақлаш омборлари ҳамда ижтимоий соҳа объектлари кўмир сақлаш биноларини техник ҳолати, захираларнинг сақланиши бўйича Сирдарё ҳудудий бўлими томонидан жойида доимий равишда ваколат доирасида ўрганишлар ўтказилганда бир қатор камчиликлар аниқланмоқда.
Ўрганишлар шуни кўрсатдики, “Ўзбекўмир” АЖ Сирдарё кўмир етказувчи филиалига қарашли Сирдарё туманида жойлашган “Бахт” кўмир омборидаги қайта ишланаётган кўмир брикет ёқилғиси нам ҳолатда эканлиги ва унинг сифати талаб даражасида эмаслиги аниқланди.
Боёвут тумани ҳудудида жойлашган 27-сонли умумтаълим мактабида кўмир ва кўмир брикет ёқилғисини сақлаш хоналарининг том қисмидан сув ўтиши, қишнинг қор ёмғир кунларида атрофдаги сувларнинг йиғилиши, тумандаги 26-16-14-сонли ўрта мактаблар кўмир ва кўмир брикет ёқилғисини сақлаш хоналарида электр ёритиш тизими билан таъминланмаган ҳолатлари аниқланди. Ушбу юзага келган камчиликлар юзасидан ҳудудий бўлим томонидан масъул ташкилотларга муаммони бартараф этиш учун тегишли кўрсатмалар берилди ҳамда бажарилиши таъминланиши назоратга олинди.
Бўлим ходимлари бу борада ишларни давом эттириб, соҳа масъулларини куз-қиш мавсумини беталофат ўтказишга ва ўз касбига садоқат билан муносабатда бўлишга чақиради.
Энергетика вазирлиги ҳузуридаги “Ўзэнергоинспекция”нинг
Сирдарё ҳудудий бўлими.
1147
