Энергетика вазирлиги махсус штаби Андижон вилоятида жойлашган Хўжаобод газни ер остида сақлаш иншооти (ГЕОСИ)да ҳам бўлдилар.
Бу ерда олиб борилаётган 2020-2021 йиллар куз-қиш мавсумига тайёргарлик жараёни билан танишишилди. Мазкур иншоот Республикамизда мавжуд 2 та йирик ГЕОСИнинг бири бўлиб, иншоотда куз-қишга тайёргарлик жараёнлари белгиланган режа асосида олиб борилмоқда.
Иншоотдаги муҳим янгиликлардан бири бу тизим фаолияти учун ўта муҳим бўлган технологик жараён – компрессор станциясининг двигателини таъмирлаш ишларининг ниҳоясига етказилганлигидир. Айни пайтда Германиянинг "ONS Trade Engineering" корхонаси ва “Ўзтрансгаз” АЖ двигатель таъмирчиларидан иборат мутахассислар томонидан тизимни тармоққа қайта улаш ишлари давом эттирилмоқда.
Энергетика вазири мазкур жараёнга масъул хорижлик ва маҳаллий мутахассислар билан суҳбатлашди. Тизимни тез муддатларда хавфсиз ишлашини таъминлаш бўйича тегишли кўрсатмалар берди.
Маълумот ўрнида: Фарғона водийси вилоятлари аҳолисини ва ҳалқ хўжалиги объектларини қиш мавсумида табиий газ билан ишончли таъминлаш мақсадида 1996-1998 йилларда Андижон вилоятидаги “Хўжаобод” нефть-газ конининг ишлаб тамом бўлган қатламлари базасида компрессор станциясига эга бўлган газни ер остида сақлаш иншооти қурилган.
Сиғими 900 млн. м3 бўлган ер ости газ омбори ва газ хайдаш агрегатларига эга “Хўжаобод” ГЕОСИ комплекси умумий қуввати 42 300 кВт бўлган компрессор станцияси ва иккита газ тўплаш пунктларини мужассамлаштирган бўлиб, 62 та газ қудуғидан фойдаланади.
“Хўжаобод” ГЕОСИнинг асосий иш фаолияти, баҳор-ёз мавсумида магистрал газ қувуридан компрессор станциясига 20-25 атмосферагача босимда газ қабул қилиб олиб, миқдори ўлчанади, суюқлик ва ҳар хил механик зарралардан тозаланади. Газ босими 250 атмосферагача компрессорланиб, совутилгандан сўнг газ қудуқларига хайдалади.
Шу тариқа газ қудуқлари орқали хайдалган газ ер ости қатламларида жамланади. Куз-қиш мавсумида ер ости қатламларида тўпланган газ заҳираси яна қудуқлар орқали газ тўплаш пунктларида йиғилиб, газни тайёрлаш цехига узатилади. У ерда газ паст температурали сепараторларда тозаланиб, қуритилиб, магистрал газ қувурларига узатилади.
Ўзбекистон Республикаси
Энергетика вазирлиги Матбуот хизмати
1712
