Бугун 14 сентябрь куни Энергетика вазирлиги махсус штаби истеъмолчиларни 2020-2021 йиллар куз-қиш мавсумида электр энергияси, табиий ва суюлтирилган газ ҳамда кўмир маҳсулотлари билан таъминлаш ишларни таҳлил қилиш мақсадида Қорақалпоғистон Республикасига борди.
Хусусан, штаб Қўнғирот компрессор станциясида бўлиб, бу ердаги цехлар фаолиятини кўздан кечирди. Бугунги кунда 270 нафар ходим меҳнат қилаётган ушбу станцияда 12 та агрегат мавжуд. Шунингдек, 1 гектар майдонда жойлашган мураккаб технологик қурилма – газ қуритиш ускунаси ва турли ўлчамдаги қарийб 500 км магистрал газ қувурларига хизмат кўрсатилади. Айни кунларда 3 та агрегат иш ҳолатида, 7 таси заҳирада ва 2 таси жорий таъмирланмоқда.
Ишчи гуруҳ аъзолари Қўнғирот техник сув таъминоти бошқармасида ҳам бўлдилар. Ушбу бошқарма томонидан шимолий ҳудуддаги Ақчалоқ, Тулей, Қорақалпоқ магистрал газ қувурлари бошқармалари, Сода заводи ва Устюрт кимё комплекси каби йирик корхоналарни техник сув билан таъминланади. Бугунги кунда ушбу бошқармада ҳам яқинлашиб келаётган мавсумга пухта ҳозирлик кўрилмоқда. Ишчи гуруҳ аъзолари мазкур икки корхонада мавжуд камчиликларни бартараф этиш бўйича тегишли кўрсатмалар берди.
Маълумот учун: Қорақалпоғистон республикаси истеъмолчиларига 2020-2021 йиллар куз-қиш мавсумида жами 1679,9 миллион куб.метр табиий газ етказиб берилади. Бу ўтган мавсумга нисбатан 34,0 миллион куб. метрга ёки 2,1 фоизга кўпни ташкил қилади.
Қорақалпоғистонда табиий газ истеъмолчилари сони 252 093 та бўлиб, шундан, 5 861 таси юридик ва 246 232 таси жисмоний истеъмолчи (хонадон) мавжуд.
Қорақалпоғистон республикаси истеъмолчиларини табиий газ билан таъминлаш мақсадида узунлиги 8911,5 км бўлган газ қувурлари ва 5141 та газ тақсимлаш пунктларидан фойдаланилади.
Шу кунга қадар умумий узунлиги 2,5 км бўлган газ қувурлари реконструкция қилинди, 5141 та газ тақсимлаш пунктлари техник тафтишдан ўтказилди.
Жорий йилнинг 1 октябридан бошлаб истеъмолчиларни газ билан таъминлашни яхшилаш мақсадида қўшимча 17 та махсус техника ва 68 нафар ходимлардан иборат, 17 та бригада фаолият юрита бошлайди.
Ўзбекистон Республикаси
Энергетика вазирлиги Матбуот хизмати
1471
