Тошкент вилоятининг янги маъмурий маркази Нурафшон шаҳрида аҳоли учун барча шарт-шароитларни яратиш, инфратузилма ва коммуникацияларни янгилаш жараёни кетмоқда. Шаҳарда турли иншоотлар қурилиши ва саноат корхоналарининг кўпайиши эса албатта табиий газга бўлган эҳтиёж ҳажмини ҳам оширади.
Шунга кўра, Нурафшон шаҳар истеъмолчиларига хизмат кўрсатувчи “Ўрта Сарой” Газ тақсимлаш станцияси “Ўзтрансгаз” акциядорлик жамияти буюртмасига асосан янгидан қурилмоқда.
Янги станциянинг қуввати олдингига нисбтан 2 баробарга ортади. ГРС шу пайтгача соатига 30 минг метр куб табиий газни тақсимлаш қувватига эга бўлган бўлса, энди бу кўрсаткич соатига 60 минг метр кубга етказилади. Бу эса шаҳарнинг соатига 53 минг метр куб ҳажмдаги талабидан бир мунча кўп кўрсаткични ташкил қилади.
Ушбу лойиҳани тез фурсатларда амалга ошириш учун “Тошкентнефтегазқурилиш” акциядорлик жамиятининг 10 дан ортиқ техника воситалари ва 30 нафарга яқин қурувчилари 2 навбатда иш ташкил этилган ҳолда иш олиб бормоқда. Станциягача 450 метр масофада кириш йўли, электр тармоғи учун бетон таянч устунлари ўрнатилди ва трансформатор қурилди. Табиий газ таъминоти станциядан қарийб 200 метр узоқликда жойлашган магистрал тармоқ орқали амалга оширилади.
Эътиборли жиҳатлардан яна бири - энди ГРС аҳоли пунктидан анча ичкарироқда жойлашган бўлиб, аҳоли учун анча хавфсиз бўлади. Операторлар учун иш ва дам олиш хоналарини қуришда ҳам замонавий лойиҳа ҳамда энергия тежамкор қурилиш материалларидан фойдаланилди. Айни кунларда қурилишнинг технологик жараёнлари 90 фоиздан ортиқроққа битказилган. Станция қурилиши тез кунларда якунланиб фойдаланишга топширилади.
“Ўзтрансгаз” АЖ Матбуот хизмати
745
