Энергетика вазирлиги махсус штаби Қашқадарё вилояти истеъмолчиларини 2020-2021 йиллар куз-қиш мавсумида табиий ва суюлтирилган газ билан таъминлаш борасида амалга оширилаётган ишлар билан танишиш мақсадида ушбу вилоятга борди.
Махсус штаб “Ўзтрансгаз” АЖга қарашли Муборак магистрал газ қувурлари бошқармаси тасарруфидаги компрессор станцияси, газ тақсимлаш станциялари, Қарши шаҳри “Беклар” МФЙ ҳудудидаги табиий газ ҳисоби назоратининг автоматлаштирилган тизими (АСКУГ)ни жорий этиш лойиҳаси доирасида газ ҳисоблаш ускуналарини ўрнатиш жараёни, Ғузор тумани “Қоракул” МФЙ Аланга массивида жойлашган суюлтирилган газ ташувчи МАН автоцистерналари ҳайдовчиларига хизмат кўрсатиш уйи, Қамаши тумани “Тўқбой” МФЙ, Яккабоғ тумани “Жийда” МФЙ ва Косон тумани “Пудина” МФЙ ҳудудидаги маиший газ баллонларни синовдан ўтказиш марказлари, Шаҳрисабз тумани “Сариосиё” МФЙдаги газ тўлдириш шахобчаси ва маиший газ баллонларни синаш цехида амалга оширилаётган ишлар билан танишди.
Қашқадарё вилояти истеъмолчиларига 2020-2021 йиллар куз-қиш мавсумида жами 1 929,1 миллион куб метр табиий газ етказиб берилади. Бу ўтган мавсумга нисбатан 1,1 фоизга кўпга кўпни ташкил қилади. Вилоятда табиий газ истеъмолчилари сони 140 100 та бўлиб, шундан 2 978 таси – юридик ва 137 122 таси – жисмоний (аҳоли) истеъмолчилари ҳисобланади.
Истеъмолчиларни табиий газ билан таъминлаш учун 3 461,3 километр газ қувурлари ва 5 423 та газ тақсимлаш пунктларидан фойдаланилади.
Жорий йил апрель ойидан айни кунга қадар вилоятдаги газ қувурларининг 3,5 километр қисми мукаммал таъмирланди ва 3,2 километр реконструкция қилинди.
Шу йил 1 октябрдан бошлаб 15 та махсус техника ва 60 нафар ходимлардан иборат 15 та бригада фаолияти қўйлга қўйилади.
Шунингдек, суюлтирилган газ истеъмолчиларига куз-қиш мавсумида жами 66 506 тонна суюлтирилган газ етказиб берилади. Бу ўтган мавсумга нисбатан 47 фоизга кўпроқни ташкил қилади. Вилоятда жами 615 581 та суюлтирилган газ истеъмолчилари мавжуд бўлиб, уларни суюлтирилган газ билан таъминлаш учун 19 та автоцистерна ва 149 та ISUZU автомашинасидан фойдаланилади.
Энергетика вазирлиги Матбуот хизмати
850
