Энергетика вазирлиги Штаби Самарқанд вилояти истеъмолчиларини 2020-2021 йиллар куз-қиш мавсумида кўмир ва брикет маҳсулотлари билан таъминлаш борасида амалга оширилаётган ишлар билан танишиш мақсадида ушбу вилоятда бўлди.
Ишчи гуруҳ Самарқанд кўмир етказувчига қарашли Бунёдкор кўмир омбори фаолияти билан танишди. У ерда брикет маҳсулотларини ишлаб чиқариш жараёнларидан тортиб истеъмолчиларгача етказиб беришдаги ишлар таҳлил қилинди.
Унга кўра, 2020 йил 26 сентябрдан вилоят кўмир омборларидаги БОМСШ маркали кўмир маҳсулотларини дробилка ёрдамида майдаланишни тўхтатиш ҳамда кўмир маҳсулотларини сортларга ажратган ҳолда фақат майда қисмидан (0-50 мм) брикет ишлаб чиқаришни йўлга қўйиш топшириғи берилди.
Жорий йилнинг 15 октябрига қадар Самарқанд вилоятининг олис ва тоғли ҳудудларига, хусусан Ургут тумани аҳолисига 17 636 тонна ва Қўшработ тумани аҳолисига 2 500 тонна кўмир маҳсулотларини ортиш ва жойига етказиб бериш ишларини якунлаш, шунингдек йил якунигача “Жомбой”, “Зарафшон” ва “Зиёвуддин” кўмир омборларига 3 та янги автоюклагич (погрузчик) техникаларини етказиб бериш юзасидан тегишли топшириқлар берилди.
Маълумот учун: вилоят истеъмолчиларига куз-қиш мавсумида жами 115,6 минг тонна кўмир ва брикет маҳсулотлари етказиб берилади. Шундан аҳоли истеъмолчиларига 80 минг тонна ва ижтимоий соҳа объектрларига 35,6 минг тонна кўмир ва брикет маҳсулотлари етказиб берилади.
Вилоят истеъмолчиларига кўмир маҳсулотларини етказиб бериш учун 11 та омбор, 9 та автоюклагич ва 11 та автотарозидан фойдаланилади.
Энергетика вазирлиги Матбуот хизмати
850
