Энергетика вазирлиги Штаби Самарқанд вилояти истеъмолчиларини куз-қиш мавсумида табиий ва суюлтирилган газ билан таъминлаш борасида амалга оширилаётган ишларни ўрганиш мақсадида ушбу вилоятда бўлди.
Ишчи гуруҳ томонидан ўрганишлар давомида “Ҳудудгаз Самарқанд” газ таъминоти филиалига қарашли Самарқанд газ тўлдириш станцияси фаолиятида бир қатор камчиликларга йўл қўйилаётганлиги аниқланди.
Хусусан, мазкур газ тўлдириш станциясида газ сақлаш шароитлари, иш олиб бориш услуби яхши ташкил қилинмаганлиги, шунингдек станцияда 3 кундан буён газ заҳираси мавжуд эмаслиги кузатилди. Бу ҳам истеъмолчиларга суюлтирилган газ етказиб бериш муддатини кечикишига олиб келиши ва оқибатда уларнинг ҳақли эътирозларига сабаб бўлиши мумкинлиги қайд этилди.
Аниқланган камчиликларни бартараф этиш мақсадида бир ҳафта муддатда станциясининг технологик асбоб-ускуналарини тўлиқ модернизация қилиш, ускуна ва қурилмаларни мақбул жойларга жойлаштириш бўйича таклиф тайёрлаб, Штабга тақдим этиш топшириғи берилди.
Маълумот учун: Самарқанд вилояти истеъмолчиларига куз-қиш мавсумида жами 1 089,8 миллион куб метр табиий газ етказиб берилади. Вилоятда табиий газ истеъмолчилари сони 297 497 та бўлиб, шундан 7 948 таси – юридик ва 289 549 таси – жисмоний истеъмолчилар ҳисобланади.
Истеъмолчиларни табиий газ билан таъминлаш учун 9 125 километр қувурлар ва 8 815 та тақсимлаш пунктларидан фойдаланилади.
Айни пайтга қадар 100 м қувурлар мукаммал таъмирланди, 1,2 километр реконструкция қилинди ва 8 144 та тақсимлаш пункти техник тафтишдан ўтказилди.
Жорий йил 1 октябрдан бошлаб 19 та махсус техника ва 72 нафар ходимлардан иборат 19 та авариявий бригада фаолият юритади.
Вилоят истеъмолчиларига куз-қиш мавсумида 48 220 тонна суюлтирилган газ етказиб берилади. 481 866 та аҳоли хонадонини суюлтирилган газ билан таъминлаш учун 10 та вагон-цистерна, 14 та автоцистерна ва 87 та ISUZU автомашинасидан фойдаланилади.
Энергетика вазирлиги Матбуот хизмати
817
