Энергетика вазирлиги Штаби Бухоро вилояти истеъмолчиларини куз-қиш мавсумида табиий ва суюлтирилган газ билан таъминлаш борасида амалга оширилаётган тайёргарлик ишлари билан танишди.
Бухоро вилоятидаги Когон газ компрессор станциясида 4 та газ ҳайдаш агрегати ўрнатилган бўлиб, бугунги кунда уларнинг ҳаммаси тўлиқ шай ҳолатда турибди.
Штаб ўрганиш давомида мавсумга пухта тайёргарлик кўриш чоралари юзасидан кечиктириб бўлмайдиган чора-тадбирларни белгилаб берди. Хусусан, 1 ноябргача “Газли” ер ости газ омборига 3,0 миллиард куб метр табиий газни жамлаш ишларини якунлаш, 2021 йил 1-ярим йиллик якунига қадар ГРСларга тўғридан-тўғри уланган 10 та АГНКС ва бошқа йирик истеъмолчилар учун алоҳида саноат тармоқлари қуриш, Бухоро вилояти газ транспорти тизими иншоотларини 2020/2021 йиллар куз-қиш даврида барқарор ишлаши учун ҳар бир тизим корхоналарида авария заҳираларини яратиш топшириқлари белгилаб берилди.
Шунингдек, қувурларда аниқланган 16 та табиий газнинг сизиб чиқиш ҳолатларини зудлик билан бартараф этиш, бир кун муддатда вилоят бўйича 97 та газ тартиблаш пунктларидаги байпас тармоқларини ёпиб, истеъмолчиларга редуктор орқали табиий газ етказиб берилишини йўлга қўйиш, 2020 йил 1 октябргача 43 та газ тартиблаш пунктлари редукторларини таъмирлаб ишга тушириш, 15 октябргача вилоятдаги 69 та газ тартиблаш пунктларига манометрлар ўрнатиш, куз-қиш мавсумида аҳоли ва ижтимоий соҳа муассасаларини бир маромда табиий газ билан таъминлаш мақсадида барча мавсумий истеъмолчиларга, жумладан ғишт заводлари, оҳак ва гипс ишлаб чиқариш цехларига 2020 йил 1 октябрдан бошлаб табиий газ етказиб берилишига йўл қўйилмалик топшириғи берилди.
Вилоятнинг барча маҳаллаларида куз-қиш мавсумини беталофат ўтказиш бўйича доимий равишда аҳоли ўртасида кенг қамровли тарғибот ва ташвиқот ишларини олиб бориш ҳамда аҳоли хонадонларидаги ностандарт ва маънавий эскирган иситиш қозонларини энергия тежамкор қозонларга алмаштириш чораларини кўриш ҳамда “Қизил” ҳудуд деб белгиланган Бухоро шаҳри аҳоли хонадонларига 66 276 дона электрон газ ҳисоблагичларни 2021 йил январь ойи якунига қадар ўрнатиш чора тадбирлари белгилаб берилди.
Маълумот учун: Бухоро вилояти истеъмолчиларига куз-қиш мавсумида 919,0 миллион куб метр табиий газ етказиб берилади Шундан аҳоли истеъмолчиларига 561,9 миллион куб метр ва улгуржи истеъмолчиларга 357,1 миллион куб метр табиий газ етказиб бериш режалаштирилган.
Вилоятда табиий газ истеъмолчилари сони 281 004 та бўлиб, шундан 5 286 таси – юридик ва 275 718 таси – жисмоний истеъмолчилар (аҳоли) ҳисобланади.
Истеъмолчиларни табиий газ билан таъминлаш учун 7 518,4 километр газ қувурлари ва 7 262 та газ тартиблаш пунктларидан фойдаланилади.
Айни пайтга қадар 9,9 километр газ қувурлари реконструкция қилинди, 7 023 та газ тартиблаш пунктлари техник тафтишдан ўтказилди.
Шу йил 1 октябрдан бошлаб 13 та махсус техника ва 52 нафар ходимлардан иборат 13 та тезкор бригада фаолият юритади.
Шунингдек, вилоят истеъмолчиларига куз-қиш мавсумида 17 766 тонна суюлтирилган газ етказиб берилади. Вилоятда 169 100 та аҳоли хонадонини суюлтирилган газ билан таъминлаш учун 4 та вагон-цистерна, 9 та автоцистерна ва 44 та ISUZU автомашинасидан фойдаланилади. Шу билан бирга 6 та газ тўлдириш станцияси ва пункти ҳамда 1 та газ баллон сақлаш сервис марказлари узлуксиз фаолият юритмоқда.
Энергетика вазирлиги Матбуот хизмати
643
