Энергетика вазирлиги Штаби Жиззах вилояти истеъмолчиларини куз-қиш мавсумида табиий ва суюлтирилган газ билан таъминлаш борасида амалга оширилаётган тайёргарлик ишлари билан танишди.
Ишчи гуруҳ томонидан ўрганиш жараёнида амалга оширилиши лозим бўлган ишлар юзасидан масъулларга тегишли кўрсатма ва топшириқлар белгилаб берилди. Хусусан, вилоят бўйича 15 та газ тартиблаш пунктларидаги байпас тармоқларини ёпиб, истеъмолчиларга редуктор орқали табиий газ етказиб берилишини йўлга қўйиш, 58 та газ тартиблаш пункти редукторларини таъмирлаб, ишга тушириш, 15 октябрга қадар 167 тасига манометрлар ўрнатиш, 73 тасини сифатли тафтиш қилиш, 58 тасининг кран ҳимояси прибор (ПЗК)ларини таъмирлаш, 26 тасининг эшикларини созлаш, 112 тасига қулф ўрнатиш ҳамда 43 тасининг атрофини ўраш ишларини бажариш ишлари белгилаб берилди.
Шунингдек, куз-қиш мавсумида аҳоли ва ижтимоий соҳа муассасаларини бир маромда табиий газ билан таъминлаш мақсадида барча мавсумий истеъмолчиларга, жумладан ғишт заводлари, оҳак ва гипс ишлаб чиқариш цехларига 2020 йил 1 октябрдан бошлаб табиий газ етказиб берилишига йўл қўйилмаслиги, бир ҳафта муддатда маҳаллий ҳокимликлар билан биргаликда куз-қиш мавсумида табиий газ етказиб берилиши кафолатланмаган истеъмолчилар рўйхатини шакллантириб, Штабга тақдим этиш, куз-қиш мавсумини беталофат ўтказиш, аҳоли хонадонларида мавжуд газ асбоблари дудбуронларининг созлигини ўрганиш ва уларни тозалаш бўйича Жиззах вилоятида сервис хизмати ташкил этиш топшириғи тасдиқланган баёнга ҳам киритилди.
Барча маҳаллаларда куз-қиш мавсумини беталофат ўтказиш бўйича доимий равишда аҳоли ўртасида кенг қамровли тарғибот ва ташвиқот ишларини олиб бориш ҳамда аҳоли хонадонларидаги ностандарт ва маънавий эскирган иситиш қозонларини энергия тежамкор қозонларга алмаштириш чораларини кўриш, куз-қиш мавсумида вилоят аҳолисига 9 139 тонна суюлтирилган газ етказиб берилишини таъминлаш, “Қизил” ҳудуд деб белгиланган Жиззах шаҳри аҳоли хонадонларига 32 440 дона электрон газ ҳисоблагичларни 2020 йил 1 декабрга қадар ўрнатиш лозимлиги белгилаб берилди.
Маълумот учун: Вилоятда табиий газ истеъмолчилари сони 151 972 та бўлиб, шундан 2 945 таси – юридик ва 149 027 таси – жисмоний истеъмолчилар (аҳоли) ҳисобланади. Истеъмолчиларга куз-қиш мавсумида жами 569,0 миллион куб метр табиий газ етказиб бериш режалаштирилган, шундан: аҳолига – 408,5 миллион куб метр ва улгуржи истеъмолчиларга 160,5 миллион куб метр.
Истеъмолчиларни табиий газ билан таъминлаш учун 5 678,3 километр газ қувурлари ва 5 394 та газ тақсимлаш пунктларидан фойдаланилади.
Айни пайтга қадар 3,8 километр газ қувурлари реконструкция қилинди ҳамда 5 126 та газ тақсимлаш пунктлари техник тафтишдан ўтказилди.
Вилоятда 26 та газ тақсимлаш станцияси мавжуд. Жорий йил 1 октябрдан бошлаб 15 та махсус техника ва 60 нафар ҳодимлардан иборат 15 та тезкор бригада фаолият юрита бошлайди.
Шунингдек, вилоятда 86 126 та аҳоли хонадонини суюлтирилган газ билан таъминлаш учун 5 та автоцистерна ва 29 та ISUZU автомашинасидан фойдаланилади. Шу билан бирга, вилоятда 4 та газ тўлдириш станцияси ва пункти ҳамда 9 та газ баллон сақлаш сервис марказлари фаолият юритмоқда.
Энергетика вазирлиги Матбуот хизмати
733
