Кеча, 30 сентябрь куни Энергетика вазирлиги Штаби Тошкент вилояти истеъмолчиларини 2020/2021 йиллар куз-қиш мавсумида электр энергияси билан таъминлаш борасида амалга оширилаётган ишлар билан танишди.
Штаб ўрганиш давомида аниқлан камчиликлар ва амалга оширилиши зарур бўлган чора-тадбирлар юзасидан масъулларга тегишли кўрсатма ва топшириқлар берди. Хусусан, 2020 йил 1 ноябрга қадар Зангиота туманида жойлашган махсус шифохонани электр энергияси билан таъминловчи 35/6 кВ “Изолятор” подстанциясидаги жисмонан эскирган 2 та 10 МВА трансформаторни замонавий трансформаторларга алмаштирилиш, Бекобод туманидаги 6 та, Зангиота туманидаги 7 та, Янгийўл шаҳридаги 5 та, Янгийўл туманидаги 3 та, Қибрайдаги 4 та, Пискентдаги 8 та, Чиноздаги 5 та, Оққўрғондаги 6 та ва Нурафшон шаҳридаги 5 та трансформатор пунктларида аниқланган техник камчиликларни бартараф этиш юзасидан баённома тузилди.
Шу билан бирга, истеъмолчиларга хизмат кўрсатиш ва авариявий узилишларни тезкор бартараф этишдаги ноқулайликларни олдини олиш мақсадида бугунги кунда битта маъмурий бинода жойлаштирилган Оҳангарон шаҳар ва Оҳангарон туман электр таъминоти корхоналарини тегишли дислокациялари бўйича тармоқларни эксплуатация қилиш ва тезкор диспетчерлик хизматларини кўрсатиш сифати ва самарадорлигини ошириш чораларини кўриш вазифаси белгилаб берилди.
Доимий равишда вилоят ҳокимлиги билан “DATA” марказида электр энергиясидан ноқонуний фойдаланиш ҳолатларини ўрганиб, ҳар бир маҳаллада янги тизим бўйича кенг қамровли тушунтириш ишларини ташкил қилиш, Тошкент вилоятида АСКУЭ тизимини татбиқ этиш мақсадида якунига қадар аҳоли хонадонларига 360 028 та замонавий электр ҳисоблагичлар ўрнатилишини таъминлаш юзасидан кўрсатма ва топшириқлар белгилаб берилди.
Маълумот учун: вилоят истеъмолчиларига куз-қиш мавсумида жами 3 959,0 миллион кВт. соат электр энергияси етказиб берилади. Вилоятда электр энергияси истеъмолчилари сони 716 224 та бўлиб, шундан 23 752 та юридик ва 692 472 та жисмоний истеъмолчилар (аҳоли) мавжуд.
Истеъмолчиларни электр энергияси билан таъминлаш учун 26,4 минг километр электр узатиш тармоқлари ва 6 313 та трансформатор пунктларидан фойдаланилади.
Жорий йилнинг 1 октябрига қадар 2 651,1 километр электр узатиш тармоқлари ва 835 та трансформатор пунктлари мукаммал таъмирланади. Бугунги кунга 27 та трансформатор пунктлари, 6,0 тонна трансформатор мойи ва 74,3 километр кабель махсулотларининг авариявий заҳираси яратилган. Шунингдек, 22 та авариявий бригада ташкил этилди.
Энергетика вазирлиги Матбуот хизмати
803
