Энергетика вазирлиги Штаби Тошкент вилояти истеъмолчиларини куз-қиш мавсумида табиий ва суюлтирилган газ билан таъминлаш борасида амалга оширилаётган тайёргарлик ишлари билан танишди.
Штаб ўрганиш давомида аниқлан камчиликлар ва амалга оширилиши зарур бўлган чора-тадбирлар юзасидан масъулларга тегишли кўрсатма ва топшириқлар берди. Хусусан, икки кун муддатда вилоят бўйича газ тармоқларидаги 48 та газ сизиб чиқиш ҳолатини бартараф этиб, истеъмолчиларга табиий газни фақат редуктор орқали етказиб берилишини таъминлаш, уч кун муддатда 10 та газ тартиблаш пункти (ГРП) регуляторларини таъмирлаб, ишга тушириш, 83 та ГРПни сифатли тафтиш қилиш, 43 тасини кран ҳимояси прибор (ПЗК)ларини таъмирлаш, 66 таси эшикларини созлаш, 60 тасига қулф ўрнатиш ва 84 таси атрофини ўраш ишларини амалга ошириши юзасидан тегишли баённома тузилди.
Шунингдек, 2020 йил 15 октябргача 65 та ГРПга манометрлар ўрнатиш, вилоят бўйича режалаштирилган газ тармоқларини мукаммал таъмирлаш ва реконструкция қилиш чора-тадбирлари бугунги кунгача бажарилмагани кўрсатиб ўтилган ҳолда ушбу ишларни жорий йил 20 октябрга қадар якунланишини таъминлаш, куз-қиш мавсумида аҳоли ва ижтимоий соҳа муассасаларини бир маромда табиий газ билан таъминлаш мақсадида барча мавсумий истеъмолчиларга, жумладан ғишт заводлари, оҳак ва гипс ишлаб чиқариш цехларига табиий газ етказиб берилишига йўл қўйилмаслик топшириғи белгилаб берилди.
Куз-қиш мавсумини беталофат ўтказиш, аҳоли хонадонларида мавжуд газ асбоблари дудбуронларининг созлигини ўрганиш ва уларни тозалаш бўйича Тошкент вилоятида сервис хизмати ташкил этилиши, вилоятнинг барча маҳаллаларида куз-қиш мавсумини беталофат ўтказиш бўйича доимий равишда аҳоли ўртасида кенг қамровли тарғибот ва ташвиқот ишларини олиб бориш ҳамда аҳоли хонадонларидаги ностандарт ва эскирган иситиш қозонларини тежамкор қозонларга алмаштириш чораларини кўриш, йил якунига қадар вилоятдаги аҳоли хонадонларига жами 191 077 дона замонавий электрон газ ҳисоблагичларни ўрнатиш ишларини амалга ошириш юзасидан тегишли кўрсатмалар берилди.
Маълумот учун: истеъмолчиларга куз-қиш мавсумида жами 4 811,6 миллион куб метр табиий газ етказиб берилади. Шундан, аҳолига – 1 724,6 миллион куб метр ва улгуржи истеъмолчиларга – 3 087,0 миллион куб метр табиий газ етказиб берилиши режалаштирилган.
Вилоятда табиий газ истеъмолчилари сони – 617 000 та бўлиб, шундан 14 112 та юридик ва 602 888 та жисмоний истеъмолчиларни (аҳоли) ташкил қилади.
Истеъмолчиларни табиий газ билан таъминлаш учун 12 916,9 киломтер газ қувурлари ва 10 945 та газ тақсимлаш пунктларидан фойдаланилади.
Айни пайтга қадар 9,2 километр газ қувурлари мукаммал таъмирланди, 1,2 километр газ қувурлари реконструкция қилинди, 9 983 та газ тақсимлаш пунктлари техник тафтишдан ўтказилди.
Жорий йилнинг 1 октябридан бошлаб 21 та махсус техника ва 84 нафар ходимлардан иборат 21 та бригада фаолият юрита бошлайди. Вилоятда 45 та газ тақсимлаш ва компрессор станциясиялари мавжуд.
Шунингдек, вилоятда куз-қиш мавсумида жами 5 413 тонна суюлтирилган газ етказиб бериш режалаштирилган. Вилоятда 49 976 та та аҳоли хонадонини суюлтирилган газ билан таъминлаш учун 2 та автоцистерна ва 28 та ISUZU автомашинасидан фойдаланилади. Шу билан бирга 3 та газ тўлдириш станцияси ва пунктлари ҳамда 1 та газ баллон сақлаш сервис марказлари фаолият юритади.
Энергетика вазирлиги Матбуот хизмати
2241
