Мазкур лойиҳа, Президентимизнинг 2020 йил 28 апрелдаги “Рақамли иқтисодиёт ва электрон ҳукуматни кенг жорий этиш чора-тадбирлари тўғрисида” қарори ҳамда “Илм, маърифат ва рақамли иқтисодиётни ривожлантириш йили” дастури доирасида ишлаб чиқилган “Рақамли Ўзбекистон - 2030” дастури лойиҳасига мувофиқ амалга оширилмоқда.
Лойиҳа мақсади: электр энергияси соҳаси бошқаруви учун замонавий автоматлаштирилган диспетчерлик тизимини яратиш бўлиб, ушбу лойиҳани 2020 – 2024 йилларда амалга ошириш режалаштирилган. Умумий қиймати
90 миллион АҚШ долларини ташкил этадиган мазкур инвестицион лойиҳа Жаҳон банки маблағлари ҳисобидан молиялаштирилади.
- “Мазкур лойиҳани амалга ошириш натижасида электр энергетика тизими бошқарувида инновацион ечим ва замонавий рақамли технологияларни қўллаган ҳолда бошқарувни амалга ошириш имконини беради”, – дейди “Ўзбекистон миллий электр тармоқлари” АЖ бошқаруви раиси ўринбосари Феруз Қурбонов. – Шунингдек, электр узатиш тармоқларида энерготежамкор технологиялардан фойдаланиш орқали тизимдаги йўқотишларни камайтириш, фавқулодда вазиятларни тезкор таҳлил қилиш, замонавий интеграциялашган бошқарув автоматлаштириш орқали электр таьминоти ишончлилиги ва сифатини ошириш кўзда тутилган. Ушбу лойиҳа доирасида тизимни бошқариш учун ёш мутахассисларни ўқитиш ва ривожланган мамлакатларда малакасини оширишга алоҳида эътибор қаратилиши белгиланган.
“Ўзбекистон миллий электр тармоқлари” АЖда Диспетчерлик назорати ва маълумотларни йиғиш тизими (SCADA) ва Энергия бошқаруви тизимини (EMS) жорий қилиш бўйича техник иктисодий асослари ҳамда тендер ҳужжатларини ишлаб чиқиш ишлари халқаро тендер танловлари орқали танлаб олинган EDF-CIST (Électricité de France – Франция) компанияси билан ҳамкорликда амалга оширилади.
Энергетика вазирлиги Матбуот хизмати
1360
